QMA Almaty qalasy boıynsha departamenti úsh sheteldik azamatty ustap, jalǵa alǵan páterde tintý júrgizý barysynda alty SIM-boks anyqtady, dep habarlaıdy Egemen.kz.
Bul qurylǵylar alaıaqtyq shemalarda keń kólemde qońyraýlar jasaý, habarlamalar jiberý jáne abonenttik nómirlerdi ózgertý úshin qoldanylady. Sondaı-aq, ártúrli mobıldi operatorlardyń 5 myńnan astam SIM-kartasy tárkilendi.
«Atalǵan tulǵalarǵa qatysty QR Qylmystyk kodeksiniń 213-baby 2-bóligi boıynsha – «uıaly baılanys abonenttik qurylǵysynyń ıdentıfıkasııalyq kodyn zańsyz qoldaný, abonentti sáıkestendirý qurylǵysyn zańsyz ózgertý jáne ıdentıfıkasııalyq kodty ózgertýge arnalǵan baǵdarlamalardy jasaý, paıdalaný, taratý» qylmystyq is tirkeldi», delingen habarlamada.Kúdiktiler eki aı merzimge qamaýǵa alyndy. Qazirgi tańda olardyń ınternet-alaıaqtyqqa qatystylyǵy tekserilip jatyr.