Reseı Memlekettik Dýmasynyń depýtaty Igor Antropenko áıelderdiń jumys kúnin kem degende bir saǵatqa qysqartýdy usyndy. Bul bastama arqyly ol áıelderdiń otbasy men jeke ómirine kóbirek ýaqyt bólýine múmkindik bergisi keletinin málimdedi, dep jazady Egemen.kz TASS agenttigine silteme jasap.
Depýtattyń aıtýynsha, qazirgi tańda ár bala túrli úıirmeler men sporttyq seksııalarǵa qatysady. Al ata-analar, ásirese analar, olardy barlyq jerge aparýǵa úlgermeıdi.
«Saǵat 18:00-de jumystan shyqqan áıeldiń balalaryn úıirmege aparýy óte qıyn, sebebi keıbir seksııalar dál sol ýaqytta nemese odan da erte bastalady. Nátıjesinde balalar sharshaǵan analaryn kóredi, bul óskeleń urpaq úshin jaqsy úlgi emes. Qazirdiń ózinde qyz balalar muny kórip, bolashaqta ana bolǵysy kelmeıtinin ashyq aıtyp júr», dedi Antropenko.
Onyń pikirinshe, otbasyna, úıine jáne bala-shaǵasyna baılanysty alańdaýshylyq keıde áıelderdi jumystan ketýge ıtermeleıdi. Sondaı-aq ol tipti áıeldiń otbasy men bala-shaǵasy bolmasa da, jumysqa daıyndalý úshin kúnine qosymsha bir saǵat qajet ekenin tilge tıek etti.
«Áıelge er adamǵa qaraǵanda áldeqaıda kóp ýaqyt kerek. Qazir demografııany kóterý máselesi ózekti bolyp tur, al eger jas qyz jumystan sharshap shyqsa, jeke ómirge ýaqytty qashan tabady? Sondyqtan názik jandylar úshin jumys ýaqytyn bir saǵatqa qysqartýdy ózekti bastama dep sanaımyn», dedi depýtat.