Otan qorǵaýshylar kúnine oraı Mańǵystaý oblysynyń Beıneý aýdanynda soǵysqa qatysqan maıdangerlerdiń urpaqtary óz ata-babalarynyń erlikterin eske alyp, rýhyna taǵzym etti. Eliniń beıbit bolashaǵy úshin janyn qıǵan jaýyngerlerdiń ónegeli ómir joly jastarǵa úlgi retinde usynylyp, rýhanı tárbıelik máni zor is-shara ótti, dep habarlaıdy Egemen.kz.
Oblys ákimdiginiń habarlaýynsha, Memorıaldyq keshendegi «Máńgilik alaý» mańyna jınalǵan jurtshylyq gúl shoqtaryn qoıyp, qaza tapqan batyrlardy únsizdikpen eske aldy.
Saltanatty jıyn barysynda Beıneý aýdanynyń ákimi Raqymjan Shalbaev, aýdandyq máslıhat tóraǵasy Ardaq Borash jáne ardagerler keńesiniń tóraǵasy Shaıhy Azanov sóz sóılep, soǵys ardagerlerine degen halyq alǵysyn bildirgen.
«Babalar rýhyna taǵzym etý – urpaqtar sabaqtastyǵy men ótkenge degen qurmettiń naqty kórinisi. Bul – jastardyń elge degen súıispenshiligin arttyryp, patrıottyq sezimin oıatatyn taǵylymdy shara», dedi uıymdastyrýshylar.
Shara aıasynda ardagerlerdiń urpaqtary ózderiniń ata-babalary jaıly esteliktermen bólisip, olardyń jaýyngerlik joly men tyldaǵy erlikterin baıandady.
Is-sharany Beıneý aýdany ákimdiginiń qoldaýymen aýdandyq ardagerler keńesi uıymdastyrǵan.