Keıingi jyldary BAQ betteri men qoǵamda «Infarkt jasaryp keledi» degen tirkes jıi jarııalanyp, talqylanyp júr. (1, 2, 3) Bul medıa-ókilderiniń aldyn ala qaqqan dabyly ma? Qoǵamnyń osy másele tóńiregindegi qorqynyshyna naqty qandaı negiz bar? Faktchekıng negizindegi bul materıalymyzda osy saýaldarǵa Qazaqstandaǵy úrdis pen álemdegi tendensııa aıasynda jaýap beremiz, dep jazady Egemen.kz.
Dúnıejúzilik densaýlyq saqtaý uıymynyń dereginshe, álemde jyl saıyn shamamen 17,9 mıllıon adam júrek-qan tamyrlary tobyna jatatyn dertten kóz jumady. Bul topqa: júrektiń ıshemııalyq aýrýy, serebrovaskýlıarlyq aýrý, revmatıkalyq júrek aýrýy jáne basqa jaǵdaılardy qamtıtyn júrek jáne qan tamyrlary aýrýlary jatady. Júrek-qan tamyrlarynan bolatyn bes ólimniń tórtten astamy ınfarkt pen ınsýltke baılanysty. Osy dertten kóz jumǵandardyń úshten biri 70 jasqa deıingi azamattar. Uıym zertteýinshe, júrek aýrýy 20 jyl boıy búkil álem boıynsha ólimniń basty sebebi bolyp otyr.
Qazaqstanda ınfarkttiń shynynda jasarý úrdisi baıqala ma? Anyqtaý nysanyna keıingi 10 jyldyq 2014-2024 jyldar aralyǵyn tańdadyq.
QR Densaýlyq saqtaý mınıstrligi usynǵan sanderekke saı 2014 jyly 1001 azamat kóz jumǵan. Onyń ishinde 4-ýi -18-29 jas aralyǵyndaǵylar. 2023 jyly bul kórsetkish osy jas sanatynda 12 adamǵa jetse, byltyr jalpy sany 1658 adamı qaza tapqan, 18-29 jas aralyǵyndaǵy azamattardyń bireýiniń ólimine ınfarkt sebep bolǵan. Al 30-39 jas aralyǵyndaǵy kórsetkishter 2014 jyly – 21, 2024 jyly – 42 adamǵa jetken.
2014-2024 jyldar aralyǵyndaǵy «Infarkt» (I21) dıagnozymen «Bekitilgen halyq tirkelim» AJ qaıtys bolǵandar týraly aqparattyń jalpy deregi mynadaı:
2014 jyly «Jedel mıokard ınfarktisi» (AHJ-10) «I21» dıagnozymen táýlik boıy isteıtin stasıonarlarda emdelgen naýqastardyń ishinde 5757 adamnyń jas kórsetkishi 18-59-dy quraǵan. 2024 jyly 18-59 jas aralyǵyndaǵy 8333 adam jedel mıokard ınfarktisimen naýqastanǵan.
2014-2024 jyldar aralyǵyndaǵy Qazaqstan Respýblıkasy boıynsha «Jedel mıokard ınfarktisi» (AHJ-10) «I21» dıagnozymen táýilik boıy isteıtin stasıonarlarda emdelgen naýqastardyń sany týraly aqparat:
Mınıstrlik málimetinshe, Jedel mıokard ınfarktisimen syrqattanýshylar 100 myń adamǵa shaqqanda 2014 jyly 62,1 paıyzdy qurasa, 2024 jyly 125, 6 paıyzǵa artqan. Demek, elimizde ınfarkttiń jasaryp kele jatqany - aqıqat.