Respublica partııasynan saılanǵan Májilis depýtaty Ekaterına Smolıakova óńirlerge jumys sapary barysynda Almaty oblysyndaǵy birqatar týrıstik nysandy araladydep jazady Egemen.kz.
Sapar aıasynda depýtat Talǵar qalasyndaǵy «Uly dala» demalys aımaǵyna baryp, jergilikti kásipkerlermen kezdesti. Kezdesýde týrızm ınfraqurylymyna qatysty ótkir máseleler kóterildi.
Kásipkerler joldardyń sapasyzdyǵyna, elektr jaryǵynyń, aýyz sýdyń, gaz jáne ınternet jelisiniń durys jumys istemeýine shaǵymdandy. Sonymen qatar joldyń jeke menshik jer telimderi arqyly ótetindigi sebepti kóptegen nysanǵa qatynaý qıyndaǵan. Jer ıeleri óz aýmaqtaryna kirýge ruqsat bermeı otyr, bul bıznes damýyna aıtarlyqtaı kedergi keltirýde.
Qonaev qalasynda depýtat jaǵajaı aımaǵyn aralap, týrızm salasynda eńbek etip júrgen kásipkerlermen kezdesti. Munda da ózekti másele kóterildi. Ákimdik jaǵalaý boıyndaǵy nysandardy biryńǵaı arhıtektýralyq stılge keltirýdi usynýda. Alaıda kásipkerler jobanyń júzege asýyna naqty kepildik bolmaıynsha, qarjy salýǵa daıyn emestikterin aıtty.
Eki tarap bir mámilege kelip, 14 tamyzǵa deıin ýaqyt berildi. Sol ýaqytqa deıin memlekettik saraptamanyń qorytyndysy daıyn bolady. Eger bıznes ıeleri jańa talaptardy qabyldamasa, jer telimderi konkýrs arqyly basqa ınvestorlarǵa usynylmaq.
– Týrızm – jaı ǵana demalys emes. Bul – eldiń bet-beınesi, jańa jumys oryndary men ınvestısııa tartýdyń kózi, óńirlerdi damytýdyń draıveri. Eger biz bul salada naqty nátıje kútsek, eń aldymen kásipkerler úshin qolaıly jaǵdaı jasaýymyz qajet, – dedi Májilis depýtaty Ekaterına Smolıakova.
Aıta keteıik, buǵan deıin depýtat Premer-mınıstr Oljas Bektenovtiń atyna depýtattyq saýal joldap, ishki týrızmdi damytý, zańsyz básekelestikti boldyrmaý jáne salalyq zańnamany jetildirý qajettiligi jóninde bastama kótergen bolatyn.