Túrli jarysta jasyndaı jarqyldap júrgen jartylaı jeńil salmaqtaǵy Abaı Jalaldyń esimi jankúıerlerge jaqsy tanys.
Sporttyq mansabyn Danııar Qasqaraýov jetekshilik etetin «Alash Praıd» klýbynan bastap, «Oktagonda» jalǵastyrǵan 21 jastaǵy Abaı qysqa ǵana merzim aralaǵynda kórermen kózaıymyna aınalyp úlgerdi. Osy kúnge deıin jeti jekpe-jek ótkizgen ol birde-bir ret jeńilistiń kermek dámin tatqan joq. Tórt kezdesýinde básekelesterin nokaýtqa jiberse, eki ret «sabmıshn» ádisin qoldandy. Bir aıta keterligi, sol jeti jekpe-jektiń altaýyn birinshi raýndta-aq aıaqtady.
Kúni keshe Abaı Jalalǵa BAÁ-niń áıgili promoýterlik kompanııasynyń kózi túskeni málim boldy. Endi ol UAE Warriors lıgasynda óner kórsetedi. Tusaýkser kezdesýin qazaq faıteri 23 shildede atalǵan memlekettiń astanasy – Ábý-Dabıde ótkizedi.