Búgin Májilis depýtaty, JSDP tóraǵasy, fraksııa jetekshisi Ashat Raqymjanov Shyǵys Qazaqstan oblysyndaǵy Beloýsovka aýylynyń turǵyndarymen kezdesip, olardyń ınfraqurylymǵa qatysty kótergen máselelerin tyńdady, dep habarlaıdy Egemen.kz.
Aýylda ınfraqurylym, sý tapshylyǵy, medısınalyq qyzmetterdiń qoljetimsizdigi men dári-dármek máseleleri ótkir tur. Ásirese turǵyndar qys kezinde qardy eritip paıdalanýǵa májbúr. Bul jaıtqa qatysty aýyl ákimi Anatolıı Tashnıchenko 1 qarashaǵa deıin sý qysymyn qalpyna keltiretindigi jóninde ýáde berdi.
Qarttarǵa arnalǵan kúndizgi stasıonardyń joqtyǵy, aýrýhanada qajetti tósek-oryndardyń jetispeýshiligi de aýyl turǵyndarynyń alańdaýshylyǵyn týǵyzyp otyr. Jańa medısınalyq ǵımarattyń qurylysy tek 2027 jyly bastalady. Budan bólek, kezdesýde dári-dármek tapshylyǵy máselesi de egjeı-tegjeıli kóterildi.
Ashat Raqymjanov bul máselelerdi sheshý úshin ýaqytsha stasıonardy uıymdastyrýdy, aýrýhanalarda medısınalyq qyzmetterdiń qoljetimdiligin arttyrýdy jáne dári-dármek satyp alý tártibin qaıta qarastyrýdy usyndy.
Kezdesý sońynda Májilis depýtaty turǵyndardyń mańyzdy talap-tilegin oryndaý turǵysynda jergilikti bıliktiń jedel áreket etýi qajet ekendigin basa aıtty.
«Turǵyndar aýyz sýmen, dári-dármektermen qamtamasyz etýdi jáne tirshilikke qajetti ınfraqurylymdy durys talap etip otyr. Ákimdik halyqtyń naqty suranystaryna jaýap berýge tıis», dedi A.Raqymjanov.
Sonymen qatar depýtat Beloýsovka turǵyndarynyń suraqtary men usynystaryn tıisti memlekettik organdarǵa joldaıtynyn, al olardyń oryndalý barysy depýtattyń qadaǵalaýynda bolatynyn atap ótti.