Memlekettiń turaqtylyǵy men qoǵamnyń damýy eń aldymen otbasynyń beriktigine baılanysty. Osy turǵyda ónegeli áýletterdiń ómir salty kópshilikke úlgi ári tárbıeniń altyn qazyǵy sanalady. Biz baıandaǵaly turǵan Igenovter otbasynyń buljymas qaǵıdasy da sol, mańaıyna izgilik dánin seýip, eldiń alǵysyna bólený.
Osydan on alty jyl buryn shańyraqtyń ýyǵy qadalǵan edi, qazir ordaly otbasyna aınaldy. Otaǵasy О́mirhan Aqymashuly úıindegi on eki balanyń onynshysy. Jary Gúlyrysty Qamıqyzy da on balaly otbasynda ósip-óngen. Sodan da shyǵar, bala kezderinen kópshil, baýyrmal bolyp ósken ekeýiniń úılerinen kisi arylmaıdy. Kelgen meımanyn tórge ozdyryp, tóredeı kútý ekeýiniń de bala kezden sińgen daǵdysy, ónege etken tárbıeleri.
Ekeýi de eńbekke epti. Jastaıynan kóliktiń, tehnıkanyń tilin jetik uǵynǵan О́mirhan búginde súıikti isin kásipke aınaldyryp otyr. Kóliktiń kez kelgen aqaýyn anyqtap, ony sartyldatyp qalpyna keltirý – kúndelikti tirligi. Alǵashynda kólik jóndeý ortalyǵynan oryn jalǵa alyp, jumys istep júrgen oǵan jeke nysan salyp alý týraly oı keledi. Osydan on jyl buryn Qaraǵandydaǵy «Kúngeı» shaǵyn aýdanynan jer alyp, jary ekeýi adal eńbektiń arqasynda eńseli úı turǵyzdy. Qazir balalaryna alańdamaıdy, emin-erkin óz aýlalarynda, kóz aldarynda asyr salyp oınap júr. Jary Gúlyrysty da aýylda óskendikten sharýaǵa shıraq. Úı turǵyzarda joldasyna bir ózi qolǵabys etedi. Bastysy, qoldarynan keledi. Sóıtip, úıiniń irgesinen jer alyp, 250 sharshy metr bolatyn nysan salady. Alty kólikke oryn bar. Kóliktiń maı-sýyn aýystyryp, qozǵaltqyshy, berilis qoraby sekildi kez kelgen bólshekti jóndep shyǵarady. Qazir balalaryn da eńbekke baýlyp júr. Aldaǵy kúnderi kásip nysanyn ózge sheberlerge jalǵa berip, tabysyn arttyrýdy kózdeıdi.
Gúlyrysty da jeke kásibin ashyp, otbasylyq tabysqa táp-táýir úles qosyp otyr. Nan sebetterin ázirleıdi. Úıde otyryp-aq toı-tomalaq pen qudalyqqa tapsyrys alady. Tipti et ystaıtyn qurylǵysymen jylqynyń qazysyn, jaıasyn, úırekti de dámdi etip jasaıdy.
Jaqynda memleket tarapynan qaıtarymsyz grant aldy. Ol qarajatqa qajetti qural-jabdyqtar alýdy josparlap otyr.
«Kúıeýim ekeýmiz balalarymyzdy barynsha adal eńbekke tárbıeleýdi ómirlik muratymyzǵa aınaldyrdyq. Bala kezinen bastap jumsap, ózimizge qolqanat qyldyq. Qazir sonyń qyzyǵyn kórip otyrmyz. Ákesine eki ul, meniń asúıdegi sharýama eki qyzym kómektesedi. Qazy aınaldyrý, shujyq etterin ázirleýdi, túrli dámdeýishin keltirip, ony ystap, keptirýdi qyzdarym da ájeptáýir úırenip aldy. Soǵan qýanamyn. Sharýa istep júrip, ákesi men uldary, anasy men qyzdary bolyp syrlasamyz. Bastysy sol, balalarymyz bilimdi, eńbekqor bolyp ósse degen ár qazaqtyń armany bizde de bar», deıdi shańyraqtyń anasy.
Shattyqqa bólengen shaǵyn memleket ulttyq qundylyqtardy joǵary baǵalaıdy. Ákeleri О́mirhan úıiniń aýlasyna kıiz úı tigip qoıypty. Ala jazdaı asty qazaqy úıden ishedi. Kıiz úıdiń ishinde qamshy, qasqyrdyń terisi sekildi kórnekilikter ádemi úılesim tapqan.
«О́zimiz bala kezde kıiz úıde óstik qoı. Sol sebepti, qazaqy qasıetti uǵynyp ósse eken deımiz. Boılaryna ulttyq tárbıe sińirse ultqa jany ashıtyn bolady», deıdi О́mirhan.
Bul shańyraq úshin ár juma – otbasy kúni. Jumanyń keshinde dámdi as daıyndap, dastarqan basynda jınalyp, bir-birine syılyq úlestirip, aptanyń qalaı ótkenin talqylap, demalysqa jospar qurý ómir saltyna aınalǵan. Barlyq aǵaıyn-týys aýyldy ańsasa, О́mirhan Igenovtiń úıine jınalady. О́ıtkeni ol – yrys uıalap, qut qonǵan shańyraq.
Qaraǵandy oblysy