Mańǵystaý oblysy – tabıǵaty qatal, klımaty qurǵaq, jaýyn-shashyny az aımaq. Shóleıt pen keń jazyqtarda malǵa da, adamǵa da qajet kókoraı shóp az ósedi. Jerústi ózenderiniń joqtyǵynan, mundaǵy tirshiliktiń basty tiregi – jerasty sýy. Sol sebepti aýyl sharýashylyǵymen aınalysatyn halyq úshin qudyq – ómirdiń negizgi kózi, tirshiliktiń tiregi, dep habarlaıdy Egemen.kz.
Sońǵy jyldary osy baǵytta aıtarlyqtaı jumystar júrgizilip jatyr. Ásirese jaıylymdardy sýlandyrýǵa erekshe mán berilip otyr. Mańǵystaý oblystyq aýyl sharýashylyǵy basqarmasynyń dereginshe, 2022 jyly 21 qudyq qazylyp, oǵan 119,7 mln teńge sýbsıdııa bólingen. 2023 jyly taǵy 22 qudyqqa 129,3 mln teńge qarajat qaralsa, 2024 jyly bir qudyqqa 3,5 mln teńge bólingen. Osylaısha sońǵy úsh jylda 47 qudyqqa jalpy 238 mln teńge memlekettik qoldaý kórsetilgen.
Bıyldan bastap «Jaıylymdardy sýlandyrý ınfraqurylymyn qurý jáne mal ósirýshi sharýashylyqtardy sýmen qamtamasyz etý» jobasy aıasynda sharýalarǵa burynǵydan da kóp múmkindik berilmek. Buǵan deıin qudyq qazýǵa ketken shyǵynnyń 50 paıyzy óteletin bolsa, endi bul kórsetkish 80 paıyzǵa deıin ulǵaımaq.
Qazirgi ýaqytta oblysta ıesiz 546 qudyq tirkelgen. Sonyń 503-i aýdan ákimdikteriniń teńgeriminde. Aýdandar boıynsha bólinisi: Beıneý – 61, Qaraqııa – 5, Mańǵystaý – 430, Munaıly – 2, Túpqaraǵan – 5 qudyq. Qalǵan 43 qudyqty zańdastyrý jumystary júrgizilýde, oǵan jergilikti bıýdjetten 6,9 mln teńge qarastyrý josparlanǵan.
Mańǵystaý úshin qudyq – tek sý kózi emes, búkil tirshiliktiń negizgi tiregi. El men malǵa ómir beretin, aımaqtyń eń basty qazynasy. Qatal klımat jaǵdaıynda jerasty sýyn ıgerý qazirgi kúnniń ǵana emes, bolashaqtyń da mańyzdy mindeti. Memlekettiń kórsetip otyrǵan qoldaýy aýyl sharýashylyǵymen aınalysatyn adamdarǵa senim beredi jáne aldaǵy kúnge degen úmitin arttyrady.