Tabıǵaty kórkem Qaskeleń qalasynda halyqaralyq mádenı-bilim berý yntymaqtastyǵy salasynda mańyzdy oqıǵa oryn aldy. Ol – Ortalyq Azııadaǵy álemge áıgili amerıkalyq kıno mektebiniń alǵashqy fılıaly New York Film Academy Kazakhstan saltanatty túrde ashyldy. Jańa kampýs Energo University men Dala Edge kreatıvti parki bazasynda quryldy, dep habarlaıdy Egemen.kz.
Saltanatty is-sharaǵa New York Film Academy prezıdenti jáne bas atqarýshy dırektory Maıkl Iаng, QR Ǵylym jáne joǵary bilim mınıstri Saıasat Nurbek, Almaty oblysynyń ákimi Marat Sultanǵazıev, AQSh-tyń resmı ókilderi, sondaı-aq kıno jáne medıa ındýstrııasynyń qaıratkerleri qatysty.
Ashylý rásiminiń atmosferasy kınematografııalyq stılde uıymdastyrylyp, qonaqtardy erekshe «dýbl túsirý» qoıylymy qarsy aldy. Saltanat barysynda stýdentter óner kórsetip, AQSh-tyń Almatydaǵy Bas konsýly Mıshel Erkın jańa oqý ornynyń mádenı jáne shyǵarmashylyq mánin atap ótti. Qonaqtarǵa kampýstyń ınfraqurylymy – kitaphana, dáris zaldary, dybys jazý jáne montajdaý stýdııalary, sondaı-aq Dala Edge kreatıvti parki kórsetildi.
Stýdentter men qatysýshylar úshin halyqaralyq mamandardyń sheberlik sabaqtary ótkizildi: NYFA rejısseri ári oqytýshysy Rob Petrı, akter jáne ımprovızasııa sheberi Mark Mochabı, AR jáne oıyn tehnologııalary salasynyń mamany Kevın Keıton, prodıýser ári rejısser Maıkl Hsıýe, klıpmeıker jáne kınorejısser Lado Kvatanııa, qazaqstandyq kınoprodıýser Qýanysh Beısek, Gollıvýd ssenarısi Gúljan Toktogul, rejısser jáne Unreal Engine mamany Bolat Aqnazarov, vızýaldy effektiler boıynsha sarapshy Denıs Vejnoves, ssenarıster Sanat Shapashov pen Sergeı Lıtovchenko, sondaı-aq NYFA akteri ári oqytýshysy Todd Brýno dáris oqydy.
Aıtýly shara sońynda «CIS MEDIA MARKET TOMORROW: CHALLENGES, FOCUS, COMMUNITY» atty paneldik talqylaý ótip, onda aımaqtyq medıanaryqtyń damý bolashaǵy sóz boldy.
NYFA prezıdenti Maıkl Iаng óz sózinde:
«Biz New York Film Academy-diń Qazaqstanda ashylǵanyna maqtan etemiz. Bul jaı ǵana bilim berý jobasy emes, aımaq talanttaryn biriktirip, olardy álemdik kıno ındýstrııasyna alyp shyǵatyn alań», – dedi.
Al, Almaty oblysynyń ákimi Marat Sultanǵazıev:
«Jańa bilim ordasy – Memleket basshysynyń elimizde jetekshi álemdik ýnıversıtetterdiń fılıaldaryn ashý jónindegi tapsyrmasyna sáıkes júzege asyrylyp otyrǵan joba. Bul – bilim berý men kreatıvti ındýstrııanyń damýyna qýatty serpin beretin, shyǵarmashyl jastarǵa jańa múmkindikter ashatyn mańyzdy qadam. Almaty oblysy tabıǵat sulýlyǵymen ǵana emes, baı mádenı murasymen de erekshelenedi. Búginde oblysta 2 mıllıonnan astam turǵyn bar, olardyń 30 paıyzdan astamyn jastar quraıdy. Bul – jańa bilim berý jobalary men shyǵarmashylyq alańdarǵa joǵary suranys bar ekenin kórsetedi», – deı kelip, alǵashqy stýdentterdi qýanyshtarymen quttyqtady.
Akademııanyń ashylýy óńirdi mádenı ári tehnologııalyq ortalyqqa aınaldyryp, Qazaqstannan ǵana emes, shetelden de daryndy stýdentterdi tartýǵa yqpal etpek.
New York Film Academy Kazakhstan – kıno, medıa jáne kreatıvti ındýstrııa salasynda bilikti mamandardy daıarlaıtyn iri bilim ordasyna aınalyp, aımaq pen eldiń órkendeýine yqpal eterine zor senim bildirdi.
Almaty oblysy.