Antalııa qalasynda ótken halyqaralyq Antalya Tourism Fair 2025 týrıstik kórmesi aıasynda Mańǵystaý oblysynyń týrızm basqarmasy, túrik kompanııasy Uluer Group jáne Qazaqstan týrıstik qaýymdastyǵy (QTQ) arasynda týrızm salasyndaǵy yntymaqtastyq týraly memorandýmǵa qol qoıdy. Qujatqa Mańǵystaý oblysynyń týrızm basqarmasynyń basshysy Ersin Ibrashev, Uluer Group kompanııasynyń bas dırektory Samı Mahmut Ýlýer jáne QTQ prezıdenti Roza Asanbaeva qol qoıdy, dep habarlaıdy Egemen.kz Mańǵystaý oblystyq Qoǵamdyq kommýnıkasııa ortalyǵyna siltep.
Mańǵystaý oblystyq týrızm basqarmasynyń málimetinshe, taraptar Mańǵystaý oblysynyń týrıstik áleýetin ilgeriletýge, birlesken ınvestısııalyq jobalardy iske asyrýǵa, sondaı-aq turaqty jáne oqıǵaly týrızm salasynda tájirıbe almasýǵa baǵyttalǵan ózara tıimdi yntymaqtastyqty damytý týraly ýaǵdalasty. Memorandýmǵa qol qoıý Qazaqstan men Túrkııa arasyndaǵy halyqaralyq áriptestikti nyǵaıtý jolyndaǵy mańyzdy qadam boldy.
Uluer Group kompanııasy – Kappadokııa men Tanzanııada áýeshar ushyrý baǵytynda jetekshi operatorlardyń biri. Kompanııa «Mangystau Balloon Festival» jobasyn júzege asyrýǵa qyzyǵýshylyq bildirdi. Bastama aıasynda 2026 jyldan bastap Bozjyra, Tuzbaıyr, Sherqala jáne Aıraqty sekildi kórikti tabıǵı landshafttar ústinde áýesharlar sherýin uıymdastyrý josparlanyp otyr. Joba kompanııanyń óz qarajaty esebinen iske asyrylatyn bolady.
Bıyl jyldyń sońyna deıin Uluer Group kompanııasynyń bas dırektorynyń Mańǵystaý oblysyna sapary josparlanǵan. Sapar barysynda áleýetti lokasııalardy zerdeleý, marshrýttardy tehnıkalyq baǵalaý jáne áýe shary týrızmin iske asyrýǵa qolaıly aımaqtardy anyqtaý kózdelip otyr. Atalǵan jobany júzege asyrý Qazaqstannyń jańa týrıstik brendine aınalyp, sheteldik ınvestısııa tartýǵa, jumyspen qamtýdy arttyrýǵa, sondaı-aq Mańǵystaý oblysynyń Ortalyq Azııadaǵy oqıǵaly týrızm ortalyǵy retindegi mártebesin nyǵaıtýǵa múmkindik beredi.
Mańǵystaý oblysy