Búgin Almaty qalasynda Respýblıka Kúnine oraı Abaı atyndaǵy Qazaq ulttyq opera jáne balet teatrynda ótken saltanatty sharada mádenıet, óner, buqaralyq aqparat quraldary, arhıv pen kitaphana isiniń ókilderi toǵysyp, mereıli sátterdi bastarynan ótkerdi, dep jazady Egemen.kz.
Megapolıstegi marapattaý rásimine QR Mádenıet jáne aqparat mınıstri Aıda Balaeva qatysyp, memlekettik marapatqa ıe bolǵan tulǵalardy merekelerimen quttyqtady.
Mınıstr Almatyda medıa, óner, arhıv jáne kitaphana salasyndaǵy 61 qyzmetkerge memlekettik nagradalar tabystady.
«Memleket basshysy mádenıet salasyn damytýǵa, shyǵarmashylyq adamdaryn qoldaýǵa erekshe kóńil bóledi. Keshe elordada bir top mádenıet jáne aqparat salasy maıtalmandary marapattaldy. Onyń ishinde Merýert О́tekeshova, Aıtqalı Jaıymov, Tamara Asar syndy óner qaıratkerleri «Halyq ártisi» ataǵymen marapattaldy. Sonymen qatar, elimizdi álemdik arenalarda tanytyp júrgen, bolashaǵyna úmit artar jastarymyzǵa da memlekettik marapattar tabystalyp otyr», – dedi mınıstr.
Búgin marapat ıeleriniń qatarynda Abaı atyndaǵy Qazaq ulttyq opera jáne balet teatry, M.Áýezov atyndaǵy Qazaq ulttyq drama teatrynyń, Respýblıkalyq akademııalyq nemis drama teatry jáne Jambyl atyndaǵy Qazaq memlekettik akademııalyq fılarmonııasynyń akterleri, rejısserleri, ákimshilik qyzmetkerleri men sahna sańlaqtary bar.
Ortalyq memlekettik arhıv jáne Á.Qasteev atyndaǵy Memlekettik óner mýzeıi mamandarynyń eńbegi joǵary baǵalandy. El baspasóziniń damýyna zor úles qosqan «Egemen Qazaqstan» gazetiniń aǵa tilshisi Ǵalym Súleımen, «Kazahstanskaıa pravda» gazetiniń ardager jýrnalısi Elena Brýsılovskaıa, sonymen qatar tele jáne radıo salasynyń ókilderi de eleýsiz qalǵan joq.
Marapattaý rásiminiń sońynda Abaı atyndaǵy Qazaq ulttyq opera jáne balet teatry solısteriniń merekelik konsert berdi.
Saltanatty oqıǵa kezekti is-sharaǵa ulasyp, Aıda Balaeva «Teatr jáne sýretshi» sımpozıýmynyń qatysýshylarymen kezdesti. Oǵan Qazaqstannyń belgili sýretshileri, sondaı-aq О́zbekstan, Qyrǵyzstan, Ázerbaıjan jáne Reseıdiń óner salasynyń ókilderi qatysty.