Injener Erzat Dýlat negizin qalaǵan «Higgsfield» jasandy ıntellekt startaby ınvestorlardan 80 mıllıon dollar kóleminde ınvestısııa tartty. Osylaısha, kompanııanyń baǵalanýy 1,3 mıllıard dollardan asyp, resmı túrde «ıýnıkorn» sanatyna endi. Beıne kontent óndirý salasyna jańa serpin ákelgen jobanyń sońǵy ınvestısııalyq aınalymyna «Accel», «GFT Ventures», «Menlo Ventures» sekildi jetekshi venchýrlyq qorlar qatysty.
Investorlardy «Higgsfield»-tiń qarqyndy qarjylyq ósimi erekshe qyzyqtyrdy. Kompanııa jyldyq tabysyn 200 mıllıon dollarǵa jetkizgenin málimdedi. «GFT Ventures» basqarýshy seriktesi Djeff Herbst áleýmettik jelilermen jumys isteıtin mamandar arasynda jasandy ıntellekt quraldaryna suranys kún sanap artyp kele jatqanyn atap ótti. Onyń pikirinshe, bul naryq aldaǵy ýaqytta tipti Gollıvýd ındýstrııasynan da aýqymdy bolmaq. Startaptyń nebári birneshe apta ishinde 10 mıllıon dollar turaqty tabysqa qol jetkizýi ınvestorlardyń senimin kúsheıtken.
Sarapshylar «Higgsfield»-tiń strategııalyq baǵytyn da joǵary baǵalap otyr. Kompanııa «OpenAI» nemese «Google» sııaqty iri oıynshylarmen tikeleı básekege túspeı, daıyn bazalyq modelderdi óz ekojúıesine biriktirip, naqty baǵyttarǵa — ásirese marketıng pen beıne óndirisine arnalǵan tıimdi sheshimder usynady. Bul ádis paıdalanýshylarǵa jyldam ári sapaly nátıje alýǵa múmkindik beredi.
Tartylǵan qarajat halyqaralyq naryqqa shyǵý, sondaı-aq ǵylymı zertteý jumystaryna baǵyttalady. Sonymen qatar kompanııa jyl sońyna deıin qyzmetkerler sanyn 70 adamnan 300-ge deıin arttyrýdy kózdep otyr. Aıta keteıik, «Higgsfield» startapyn 29 jastaǵy otandyq ınjener Erzat Dýlat pen onyń seriktesi Aleks Mashrabov qurǵan. Erzat jasandy ıntellekt salasyndaǵy kásibı zertteýshi retinde jobanyń ıdeıalyq negizin qalap, ony sátti iske asyrdy. Qazirgi tańda platforma mátin arqyly beıne jasaý múmkindigin usynyp, kreatıvti ındýstrııa ókilderiniń jumysyn aıtarlyqtaı jeńildetip otyr.