Kásipkerler quqy qorǵaldy

О́ńirlik kásipkerler palatasy kásipkerler men ınvestorlardyń quqyǵyn qorǵaý jónindegi mobıl­di toptardyń, reıderlikke jáne zańsyz qylmystyq qýdalaýǵa qatysty ótinishterdi qaraıtyn vedomstvoaralyq jumys tobyna belsendi qatysady. 2025 jyly mobıldi topqa 51 aryz kelip túsken. Nátıjesinde, 16 384 kásipkerdiń, 135 ınvestordyń quqyǵy qorǵaldy. 22 usynys engizilip, 30 tulǵa tártiptik, 3-eýi ákimshilik jaýapkershilikke tartylypty.

Kásipkerlerge qoljetimdi baılanys arnalary men ótinish berý tetikteri palatanyń resmı ınternet-resýrstarynda ornalas­tyrylyp, únemi jańartylyp otyrady. Bul sharalar – bıznesti qorǵaıtyn quraldar bar ekenin jurtqa jetkizýdiń bir tetigi ári kásipkerdiń ótinishterine jedel áreket etýge múmkindik.

Ekonomıkalyq tergep-tekserý departamentimen de qarym-qatynas durys jolǵa qoıyl­ǵan. Buǵan qosa, óńirlik kásip­kerler palatasy Ádilet depar­ta­menti, jeke sot oryndaýshylar­men úshjaqty memorandým ja­sas­qan. Sonyń aıasynda jeke sot oryndaýshylarynyń qyzmetine qatysty kásipkerlerdiń proble­ma­lyq ótinishteri jyldam she­shimin tapty. Iаǵnı olardyń shot­ta­ryndaǵy negizsiz buǵattaýlar alynyp, qarjylyq-sharýashylyq qyzmeti qalpyna keltirildi. Bız­­nesti qorǵaýdyń mańyzdy qural­darynyń biri – Kásip­ker­lerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńes. Byltyr Keńestiń 10 oty­rysy ótip, 15 problemalyq másele qaraldy.

О́ńirlik keńesterdiń jumysy kásipker quqyǵyn buzǵan kináli laýazymdy tulǵalardy jaýap­ker­shilikke tartýmen baǵalanady. Osy rette, kásipkerlik qyzmetke zańsyz aralasqany úshin salyq organynyń jáne densaýlyq saqtaý basqarmasynyń qyzmetkerleri ákimshilik jaýapkershilikke tartyldy. Al Shymkent qalasy Sáýlet jáne qala qurylysy basqar­ma­synyń bas mamandaryna «sógis» túrinde tártiptik jaza belgilendi.

«Palata jergilikti atqarýshy organdardan kelip túsken 98 nor­matıvtik-quqyqtyq akt joba­la­rynyń 23-ine eskertý men usynys berip, saraptamalyq qory­tyn­dylar ázirledi. Bul – kásip­ker­lerge syn-qaterlerdi azaıtýǵa, quqyqty kúsheıtýge múmkindik beretin nor­malar», deıdi Shymkent qala­lyq kásipkerler palatasy dırek­torynyń orynbasary Maııa Isaeva.

Mamannyń aıtýynsha, bıznes múddesin qorǵaıtyn zańdardy ázirleý men júıeleý maqsatynda qalalyq Ádilet departamenti janynan memlekettik organdardyń zań qyzmetterin úılestiretin keńes qurylǵan. Onyń quramynda О́ńirlik kásipkerler palatasy da bar.

О́ńirde kásipkerlerdiń quqyq­tyq saýattylyǵyn arttyrý men quqyqbuzýshylyqtyń aldyn alýǵa baǵyttalǵan keshendi is-sharalar da qolǵa alynǵan. Sonyń sheńberinde órt pen sanıtarlyq qaýipsizdik, qoǵam­dyq tártip, avtorlyq quqyq, sondaı-aq zańsyz tekserý máse­leleri bıznes ókilderine túsin­diril­di.

Qala ákimi óńir kásipkerlerimen jyl saıyn kezdesý ótkizedi. Bul bılik pen bıznes arasynda ashyq dıalog baryn kórsetedi. Mundaı mazmundaǵy júzdesý problemalardy jedel sheshýge, kásipkerlikti damytýǵa, qalanyń ınvestısııalyq tartymdylyǵyn arttyrýǵa óte tıimdi, deıdi mamandar.

О́ńirlik kásipkerler palatasy bıznesti qorǵaý, memleket pen kásipkerler arasyndaǵy senim­di nyǵaıtý, qolaıly iskerlik orta qalyptastyrý baǵytyndaǵy ju­mys­­taryn jalǵastyra bermek.

Shymkent