Astana Hub pen Salıdat Qaıyrbekova atyndaǵy Ulttyq ǵylymı densaýlyq saqtaýdy damytý ortalyǵy yntymaqtastyq týraly memorandýmǵa qol qoıdy. Bul áriptestik elimizde densaýlyq saqtaý salasyna jańa tehnologııalardy batylyraq engizýge múmkindik beredi. Ásirese medısınaǵa arnalǵan sıfrly ónimder men jasandy ıntellekt sheshimderiniń jolyn ashpaq, dep jazady Egemen.kz.
Aldymen MedTech uǵymyn qarapaıym túsindirip alaıyq. MedTech degenimiz medısınaǵa kómektesetin tehnologııalar. Oǵan dárigerdiń jumysyn jeńildetetin mobıldi qosymshalar, pasıentti qashyqtan baqylaý júıeleri, taldaý jasaıtyn platformalar, medısınalyq qurylǵylarǵa arnalǵan baǵdarlamalar jáne klınıkalyq úderisti retteıtin sıfrly servıster kiredi. Maqsaty bireý: dıagnoz qoıýdy naqtylaý, emdi baqylaýdy jeńildetý, ýaqytty únemdeý jáne qyzmet sapasyn arttyrý.
Memorandým aıasynda Ulttyq ǵylymı densaýlyq saqtaýdy damytý ortalyǵy startaptar ázirlegen ónimderdi baǵalaý kezinde saraptamalyq jáne ádistemelik qoldaý kórsetedi. Bul degen sóz jobanyń medısınaǵa paıdasyn, qoldaný logıkasyn, qaýipsizdik pen jaýapkershilik máselelerin jáne klınıkalyq ortaǵa qanshalyqty úılesetinin kásibı turǵydan qarap beredi. Iаǵnı startap tek ıdeıamen ǵana qalmaıdy, naqty medısınalyq talaptarǵa jaqyndaıdy.
Dárigerge kómekshi
Ortalyqtyń róli munymen shektelmeıdi. Sıfrly jáne JI ónimderin baǵalaýda olar ádistemelik usynym berip, qandaı kórsetkishter mańyzdy ekenin kórsetedi. Mysaly derektiń sapasy, algorıtmniń turaqtylyǵy, nátıjeni túsindirý múmkindigi, dárigerdiń sheshimine qalaı kómektesetini, pasıent úshin táýekeli bar ma degen sııaqty suraqtar kún tártibine shyǵady. Densaýlyq saqtaý salasynda «jumys isteıdi» degen sóz azdyq etedi. «Qaýipsiz», «dáleldi», «tájirıbege engizýge daıyn» bolýy kerek.
Astana Hub tarapynan startaptar jobalaryn kásibı baǵalaýdan ótkize alady. Baǵalaý trekshn derekteri, analıtıka jáne prezentasııalyq materıaldar arqyly júrgiziledi. Trekshn degenimiz ónimniń «tiri» ekeniniń belgisi. Qansha qoldanýshy bar, qansha uıym qyzyǵyp otyr, servıs qanshalyqty turaqty jumys isteıdi, naryqta suranys bar ma degen naqty kórsetkishter. Osyndaı derekter arqyly startap álsiz tusyn anyq kórip, qaı jerin kúsheıtý keregin túsinedi.
Dáriger «iPhone»
Eki taraptyń baılanysy bir maqsatqa toǵysady. Densaýlyq saqtaý salasyn sıfrly transformasııalaý, jasandy ıntellekt sheshimderin kezeń-kezeńimen engizý jáne Qazaqstanda jetilgen MedTech ekojúıesin damytý. Ekojúıe degenimiz bir ǵana kompanııa emes. Bul startaptar, dárigerler qaýymy, ǵylymı sarapshylar, memlekettik júıe, klınıkalar men ınvestorlar bir baǵytta jumys isteıtin orta.
Mundaı áriptestiktiń praktıkalyq paıdasy da túsinikti. Dáriger qujatqa kóp ýaqyt joǵaltpaı, naýqasqa kóbirek kóńil bólýi múmkin. Taldaý men suryptaý avtomattansa, kezek qysqarýy yqtımal. Al derekke súıengen sıfrly quraldar durys qoldanylsa, qatelik táýekeli azaıyp, sheshim qabyldaý jyldamdaýy múmkin. Árıne, munyń bári ónimderdiń sapasyna jáne olardy durys engizýge baılanysty.
Perý dárigerleri sıam egizderin ajyratty
Memorandým Astana Hub-ta ósip kele jatqan startaptarǵa medısınalyq júıege kirýdiń túsinikti jolyn usynsa, ǵylymı ortalyqqa jańa tehnologııalardy qaýipsiz ári dál baǵalap, tájirıbege laıyqtaýǵa múmkindik beredi. Bul qadam densaýlyq saqtaý men ınnovasııa arasyndaǵy kópirdi bekemdeı túsedi.