ASTANA. 24 aqpan. Kıpr Reseıge qatysty sanksııalarǵa qarsylyq bildirdi. Bul týraly Lenta.ru habarlaıdy.
Kıprdiń prezıdenti Nıkos Anastasıadıs Máskeýge barǵan resmı sapary barysynda agenttikke bergen suhbatynda sanksııalarǵa qatysty syn aıtty. Onyń aıtýynsha, sanksııany salýshylar kózdegen nátıjelerine qol jetkizgen joq.
«Eýroodaqqa múshe bolǵaly beri Kıpr Reseı Federasııasyn mańyzdy strategııalyq seriktes el dep esepteıtin jáne ári qaraı da solaı esepteıtin elderdiń tobyna kirdi», - dedi ol.
Anastasıadıs Kıpr men Reseıdiń ózara tyǵyz baılanysta ekenin aıtty. «Bul qarym-qatynas bizdiń ekonomıkamyz ben qorǵanys júıesine qatysty. Biz Reseıden jeńildetilgen nesıe aldyq, Kıprge Reseıdiń myńdaǵan fırmasy ınvestısııa ákelip otyr. Bizde 30 myń reseılik azamat turady. Týrızm de sizderdiń otandastaryńyzdyń arqasynda edáýir damyp keledi. Sondyqtan bul sanksııalar tek Reseıge ǵana emes, Kıprge, Avstrııaǵa, Ispanııaǵa, jalpy, kúlli Eýropaǵa keri áser etip otyr», - dedi ol.
Anastasıadıstiń sózine qaraǵanda, Kıpr kóptegen eýropalyq elderdiń ekonomıkasyndaǵy ahýaldy qıyndatyp, Ýkraına halqynyń keleshegi úshin eshqandaı paıda ákelmegen sanksııalardyń maqsaty týraly suraqty Eýropalyq odaqqa ashyq túrde qoıyp otyr.
«Eýropalyq odaqqa múshe elderdiń kópshiliginde sanksııalardyń múmkindik týǵyzýdyń ornyna, eýropalyq elder men halyqtarǵa kerisinshe áser etip jatqany týraly pikirler kúsheıip keledi. Kıpr - shaǵyn memleket jáne bizde alpaýyt elderdiń pozısııasyna yqpal etetin múmkindik joq, biraq biz osylaısha az bolsa da sanksııanyń zardabyn azaıtyp, jumsartqymyz keledi», - dep moıyndady Kıpr prezıdenti Nıkos Anastasıadıs.
Eske sala keteıik, buǵan deıin Kanadanyń Reseıge qarsy jańa sanksııalardy engizgeni týraly habarlanǵan edi. Aqpannyń 18-nde Kanadanyń premer-mınıstri Stıven Harper Reseı men Ýkraınanyń 37 azamatynyń elden shyǵýyna tyıym salý týraly, 17 reseılik jáne ýkraınalyq kompanııaǵa ekonomıkalyq sanksııalar engizilgeni týraly málimdemeni jarııalady. Reseıge qarsy jańa sanksııalar Ýkraınadaǵy sońǵy aptalardaǵy sarbazdardyń áreketterine jaýap retinde engizilgen.
Murat Aıtqoja.