Elimizde azamattardyń zeınetaqy jınaǵynyń qory bıylǵy 1 naýryzdaǵy esep boıynsha 26,87 trln teńgeden asty. Keıingi bir jyldaǵy ósim – 4,19 trln teńge (18,5%).
2026 jylǵy 1 naýryzda mindetti zeınetaqy jarnalary (MZJ) esebindegi jınaq kólemi 25,23 trln teńge boldy. Bir jyldaǵy ósim 3,35 trln teńgege (15,3%) jetti. Mindetti kásiptik zeınetaqy jarnalary (MKZJ) bir jylda 14,8%-ǵa ósip, 746,91 mlrd teńge boldy. Bir jyl ishindegi eń qomaqty ósim – erikti zeınetaqy jarnalarynda (23,6%). Onyń kólemi bıylǵy aqpanda 9,89 mlrd teńgeni kórsetti. Salymshylardyń (alýshylardyń) zeınetaqy shottaryna 2024 jylǵy 1 qańtardan túse bastaǵan jumys berýshiniń mindetti zeınetaqy jarnalary (JMZJ) da eselene artqan. Naqtylasaq, byltyrǵy dál osy kezeńmen salystyrǵanda bıyl 2,8 esege ulǵaıyp, 879,18 mlrd teńge boldy.
Zeınetaqy jınaqtary zeınetaqy jarnalary men ınvestısııalyq kiris túrindegi kiris esebinen molaıady. 2026 jyldyń alǵashqy eki aıynda salymshylardyń jeke ári shartty zeınetaqy shottaryna 571,83 mlrd teńge tústi. Bul byltyrǵy qańtar-aqpan aılarymen salystyrǵanda 15%-ǵa (74 501,45 mlrd teńge) artqanyn kórsetedi.
Jeke zeınetaqy shottaryna (JZSh) bıyl jyl basynan beri 446,35 mlrd teńge túsken. Qańtar aıynan beri salymshylardyń shottaryna túsken taza ınvestısııalyq kiris 523,88 mlrd teńgeden asty. Qańtar-aqpandaǵy BJZQ-dan jarnalardyń barlyq túrlerine jasalǵan tólemder men saqtandyrý uıymdaryna aýdarymdar 237,13 mlrd teńge boldy. Zeınet jasyna tolýyna baılanysty tólemder 42,32 mlrd teńgege jetti. BJZQ-dan zeınet jasyna tolýyna baılanysty kestege saı beriletin ortasha aılyq tólem – 38 735 teńge.
2026 jyldyń basynan beri turǵyn úı jaǵdaılaryn jaqsartýǵa, sonymen qatar emdelýge arnalǵan birjolǵy zeınetaqy tólemderi esebinen 86,26 mlrd teńge jumsalǵan. Muragerlikke – 26,86 mlrd teńge, elden kóship ketýine baılanysty – 6,67 mlrd teńge, múgedektigi bar adamdarǵa – 665,93 mln teńge, jerleýge 1,63 mlrd teńge kóleminde tólem jasaldy. Saqtandyrý uıymdaryna 72,73 mlrd teńge aýdaryldy.