ASTANA. 27 aqpan. M.О́temisov atyndaǵy Batys Qazaqstan memlekettik ýnıversıtetiniń rektory laýazymyna Ashat Sálimuly Imanǵalıev taǵaıyndaldy. Bul týraly Bilim jáne ǵylym mınıstrliginiń baspasóz qyzmeti habarlady.
«Qazaqstan Respýblıkasy Úkimetiniń 2011 jylǵy 18 qarashadaǵy №1353 qaýlysymen bekitilgen memlekettik kásiporynnyń basshysyn taǵaıyndaý jáne attestattaý, sondaı-aq onyń kandıdatýrasyn kelisý qaǵıdalarynyń 21-shi tarmaǵyna sáıkes Qazaqstan Respýblıkasy Bilim jáne ǵylym mınıstriniń 2015 jylǵy 29 qańtardaǵy №11 buıryǵymen bekitilgen memlekettik kásiporyndardyń basshylaryn irikteý, taǵaıyndaý jáne attestattaý jónindegi komıssııanyń sheshimi boıynsha Qazaqstan Respýblıkasy Bilim jáne ǵylym mınıstriniń buıryǵymen «M.О́temisov atyndaǵy Batys Qazaqstan memlekettik ýnıversıteti» sharýashylyq júrgizý quqyǵyndaǵy respýblıkalyq memlekettik kásipornynyń rektory laýazymyna Ashat Sálimuly Imanǵalıev taǵaıyndaldy», delingen habarlamada.
Ashat Imanǵalıev 1953 jyly Atyraý qalasynda týǵan. Pedogogıka ǵylymdarynyń doktory, professor. Ol Atyraý pedogogıkalyq ınstıtýtynyń tarıh fakýltetin (qazirgi Atyraý memlekettik ýnıversıtetti) jáne Almatydaǵy pedogogıkalyq ǵylymdary ǵylymı-zerteýlik ınstıtýtynyń aspırantýrasyn (1985) bitirgen. Atyraýdaǵy temir jol kóligi tehnıkýmynda oqytýshy (1975–76), bastaýysh komsomol uıymynyń hatshysy (1977–79), Atyraý pedogokıkalyq ınstıtýtynda oqytýshy, aǵa oqytýshy, dosent (1991), ǵylymı jumystar jónindegi prorektory bolǵan. 2000 jyldan Atyraý ýnıversıtetiniń rektory qyzmetin atqardy.
«Joǵary synyp oqýshylarynyń saýyqtyrý dene tárbıesi júıesindegi pedagogıkalyq valeologııanyń damýy» degen taqyrypta doktorlyq dıssertasııa qorǵady. Onyń ǵylymı jumystarynyń negizgi baǵyty – joǵary mektep pedagogıkasy, pedogogıkalyq valeologııa jáne qazaq ulttyq pedagogıkasy men ulttyq tárbıe máseleleri.
Ashat Sálimulynyń 80-nen astam ǵylymı jarııalanymnyń, onyń ishinde monografııalar men oqýlyqtardyń avtory. «Parasat» ordenimen jáne medaldarmen marapattalǵan.
Joldybaı Bazar.
Derek, sýret: Bilim jáne ǵylym mınıstrliginiń baspasóz qyzmeti.