QOSTANAI. 27 aqpan. «Agrotehmash» iri aýyl sharýashylyǵy zaýytynyń ujymy kezekten tys saılaý ótkizýdi qoldap, jınalys ótkizdi. Jıyn barysynda zaýyt qyzmetkerleri Elbasyǵa óz kandıdatýrasyn usynýdy ótinip, úndeý joldady. Bul týraly alau.kz habarlady.
«Agrotehmash» jaýapkershiligi shekteýli seriktestigi elimizdegi aýyl sharýashylyǵy tehnıkalaryn jasaý kásiporny. Odan bólek, oblys óńirindegi birden bir eski zaýyt bolyp sanalady. Onyń irgetasy 1942 jyly qalandy. Búginde zaýytta 400-den asa qyzmetker eńbek etedi. О́ndiris ornynda ártúrli ónimderdiń 500 túri daıyndalady. Osynyń barlyǵy eńbek ujymynyń mańdaı terimen jáne memleket qoldaýymen múmkin bolyp otyr. Sondyqtan zaýyt ujymy elimizde kezekten tys ótetin Prezıdent saılaýyn qoldaıdy.
«Bizdiń laıyqty kóshbasshymyz bar, tynysh, beıbit ómir súremiz. Kúndelikti jumysymyz bar, eńbekaqymyzdy alamyz. Osynyń barlyǵy úshin biz Elbasymyzǵa qaryzdarmyz. О́z elimizge laıyqty Kóshbasshyny tańdaý úshin saılaýǵa baramyz», – deıdi zaýyt jumysshysy A.Varapaeva.
Atalǵan mekemeniń ujymy Elbasynyń atyna hat jazyp, aldaǵy saılaýǵa qatysý úshin óz kandıdatýrasyn usynýdy surady. Bul jóninde zaýyt dırektory V.Kýs: «Biz «Nurly jol» ekonomıkalyq baǵdarlamasyn qoldaıtynymyzdy málimdeımiz. Sondaı-aq, kezekten tys saılaýdyń ótýin qoldaı otyryp, biz óz tańdaýymyzdy jasadyq. Soǵan baılanysty Nursultan Nazarbaevtan óziniń kandıdatýrasyn usynýdy ótinemiz», dedi.
Názıra Járimbetova
Derek, sýret: alau.kz.