Almatydaǵy Ál-Farabı dańǵylynda bolǵan qaıǵyly jol apatyna qatysty jańa derek paıda boldy, dep habarlaıdy Egemen.kz.
Ktk.kz-tiń habarlaýynsha, apattyń kýágerleri jalǵan jaýap berdi degen kúdikke ilingen. Naqtyraq aıtsaq, áńgime apatqa sebepshi bolǵan Zeekr avtokóligi júrgizýshisiniń dostary týraly bolyp otyr. Jábirlenýshi taraptyń advokaty málimdegendeı, tergeý kezinde olar kináli dep tanylǵan júrgizýshiniń mas bolǵanyn jasyrýǵa tyrysqan.
Kúdiktiniń dostary alǵashqy tergeý kezinde onyń ishimdik ishpegenin alǵa tartqan. Alaıda medısınalyq saraptama júrgizýshiniń qanynda 1,3 promılle alkogol bolǵanyn anyqtady. Anyqtaýshylar qol jetkizgen meıramhana shotynyń kóshirmesinde spırttik ishimdikterge tapsyrys berilgeni resmı túrde dáleldengen.
Ál-Farabı dańǵylyndaǵy apat: Kúdikti sotta óz kinásin tolyq moıyndady
Osyǵan baılanysty bul materıal bólek óndiriske alynyp, Tergeý basqarmasyna joldandy. Zań boıynsha, kórineý jalǵan jaýap bergen kýágerlerdiń kinási dáleldense, olar 6 jylǵa deıin bas bostandyǵynan aıyrylýy múmkin.
Eske sala keteıik, jantúrshigerlik jol apaty osydan eki aı buryn bolǵan edi. Tergeý nusqasy boıynsha mas júrgizýshi tizgindegen Zeekr kóligine jalǵan nómir taǵylǵan. Kólik qala ishinde 219 shaqyrym/saǵat jyldamdyqpen júrip, qarsy betke shyǵyp ketken jáne Mercedes kóligine soǵylǵan. Soqqy saldarynan Mercedes-tiń 29 jastaǵy júrgizýshisi men 20 jáne 22 jastaǵy eki boıjetken jolaýshysy oqıǵa ornynda til tartpaı ketti.
Sot otyrysynda qaza tapqan eki azamattyń jaqyndary júrgizýshini keshirgenderin aıtyp, ony bas bostandyǵynan aıyrmaýdy surady. Olar muny aıyptalýshy taraptyń shyǵyndy tolyq ótep bergenimen túsindirdi. Qazi sot prosesi jalǵasyp jatyr.