Shymkenttik «Ordabasy» fýtbol klýbynyń prezıdenti Darhan Qyzaıbaev komandanyń resmı ataýyn ózgertý jáne aýqymdy rebrendıng júrgizý jospary týraly málimdedi. Klýb basshylyǵy bul qadam komandanyń eýropalyq arenadaǵy tanymaldylyǵyn arttyrý úshin jasalyp jatqanyn alǵa tartty, dep habarlaıdy Egemen.kz.
«Biz klýbtyń ataýyn ózgertýdi josparlap otyrmyz. Jańa esimniń «FC Orda Shymkent» bolǵanyn qalaımyz. Bizdiń basty maqsatymyz – bolashaqta Eýropada turaqty túrde óner kórsetý. Sondyqtan «Ordabasy» dep sozyp aıtqannan góri, qysqa ári nusqa «Orda» deý durysyraq bolady. Bul ataý sheteldikter men eýropalyqtar úshin qabyldaýǵa áldeqaıda jeńil bolady. Alaıda klýbtyń maǵynasy, fılosofııasy men tarıhy esh ózgerissiz qalady. Árıne, buǵan qosa oıyn formasy men logotıp te jańarady. Aǵymdaǵy maýsymda bárin daıyndap, jankúıerlerimizge tanystyramyz. Barlyq ózgerister resmı túrde kelesi maýsymnan bastap kúshine enedi dep josparlanyp otyr», dedi ol.
«Ordabasy» orda buzdy
Ataýyn ózgertýge daıyndalyp jatqan Shymkent ujymy qazirgi ýaqytta ishki birinshilikte de kósh bastap tur. Qazir «Ordabasy» Qazaqstan Premer-lıgasynyń (QPL) týrnırlik kestesinde 12 týrdyń qorytyndysy boıynsha 28 upaı jınap, senimdi túrde birinshi orynda keledi.