«Arlandar» jartylaı fınalda!

ASTANA. 28 naýryz. Búkilálemdik boks serııasynda «Astana arlandary» 11-jeńisterine qol jetkizdi. Búgin tańda Maıamı qalasynda ótken «AQSh nokaýtshylaryna» qarsy kezdesýde «arlandar» 5:0 esebimen basym tústi. Bul týraly egemen.kz habarlady.

«AQSh nokaýtshylary» – «Astana arlandary» 0:5

49 kg: Djoshýa Franko – Temirtas Júsipov 1:2 (48:47, 47:48, 47:48). 56 kg: Fransısko Martınes – Meıirbolat Toıytov 0:3 (46:49, 46:49, 46:49). 64 kg: Taırek Irbı – Samat Báshenov 1:2 (46:49, 49:46, 47:48). 75 kg: Kelvın Henderson – Meıirim Nursultanov 0:3 (46:49, 47:48, 46:49). 91 kg: Edrıan Teılor – Vasılıı Levıt 0:3 (46:49, 46:49, 45:49). Osy jeńisinen keıin bizdiń komanda 33 upaıǵa ıe boldy. Bul kórsetkish merziminen buryn óz tobymyzda («V») birinshi oryn alýǵa múmkindik berdi. Sebebi, topta ókshemizdi basyp kele jatqan negizgi qarsylasymyz «Baký ottarynyń» enshisinde búginde 20 upaı bar. Al olar bul synda áli tórt kezdesý ótkizedi. Sonyń barlyǵynda jeńiske jetken kúnniń ózinde eń kóbi 12 upaı jınaıtyny belgili. Ázerbaıjandar endi kóp degende 32 upaı ǵana oljalaı alady. Iаǵnı, qandaı jaǵdaı bolsyn bizdiń boksshylardy basyp ozatyn esh múmkindikteri joq. Toptaǵy birinshi orynmen qatar «Astana arlandary» jartylaı fınalǵa beriler joldamany da ıemdengenin aıta keteıik. Oǵan deıin toptyq kezeńdegi úsh kezdesýi bar. Naqty aıtar bolsaq, Marat Jákıevtiń shákirtteri 11, 18, 25 sáýir kúnderi sáıkesinshe, Pýerto-Rıko, Argentına jáne Italııa komandalaryna qarsy sharshy alańǵa shyǵady. Elaman Qońyr. Derek: egemen.kz. Sýret: instagram.com.