ASTANA. 28 naýryz. Keshe túnde fýtboldan 2016 jylǵy Eýropa chempıonatyna irikteý týrnıri aıasynda 9 oıyn ótti. Sonyń ishinde bes komanda iri eseppen jeńiske jetti. Taǵy úsh matchta jeńimpazdar anyqtaldy. Al Chernogorııa men Reseı arasyndaǵy oıyn 68-mınýtta toqtatylyp, aıaqsyz qaldy. Bul týraly egemen.kz habarlady.
Aldymen alǵashqy segiz oıynnyń nátıjesine toqtalaıyq:
Anglııa – Lıtva 4:0
Goldar: Ýeın Rýnı 6, Dennı Ýelbek 45, Rahım Sterlıng 58, Garrı Keın 73.
Ispanııa – Ýkraına 1:0
Gol: Alvaro Morata 28.
Lıhtenshteın – Avstrııa 0:5
Goldar: Martın Harnık 14, Mark Iаnko 16, Davıd Alaba 58, Zlatko Iýnýzovıch 74, Marko Arnaýtovıch 90+3.
Makedonııa – Belarýs 1:2
Goldar: Aleksandr Traıkovskı 9 – Tımofeı Kalachev 44, Sergeı Kornılenko 82.
Moldova – Shvesııa 0:2
Goldar: Zlatan Ibragımovıch 46, 84 (penaltı).
Slovakııa – Lıýksembýrg 3:0
Goldar: Adam Nemes 10, Vladımır Vaıss 21, Peter Pekarık 40.
Slovenııa – San-Marıno 6:0
Goldar: Iosıp Ilıchıch 10, Kevın Kampl 49, Andraj Strýna 50, Mılıvoe Novakovıch 52, Deıan Lazarevıch 73, Branko Ilıch 88.
Shveısarııa – Estonııa 3:0
Goldar: Fabıan Sher 17, Granıt Djaka 27, Harıs Seferovıch 80.
Chernogorııa – Reseı 0:0 (66-mınýtta toqtatyldy)
Endi jankúıerlerdiń nazaryn aýdarǵan Chernogorııadaǵy oıynǵa nazar aýdaraıyq. Kezdesý Podgorısa qalasynda ótti. Ádettegideı match aldyndaǵy barlyq resmı sharalardan keıin tóreshi ysqyryq shaldy. Dopty oıynǵa alań ıeleri qosty. Tórt-bes fýtbolshy dopqa aıaq tıgizip úlgermesten kezdesý toqtatyldy. Bul kezde oıynnyń bar bolǵany 10-sekýndy júrip jatqan edi. Matchtyń toqtatylý sebebi, Chernogorııa jankúıerleriniń biri Reseı qaqpashysy Igor Akınfeevke perotehnıkalyq qural laqtyryp, oıynshyny aýyr jaraqattady. Oty laýlaǵan petarda qaqpashynyń dál jelke tusyna tıip, shashynyń belgili bir bóligin kúıik shaldy. Sondaı-aq, Akınfeevtiń baıqaýsyzda bolǵan qatty soqqydan mıy shaıqalǵan. Nátıjesinde, dárigerler oıynshyny arnaıy kólikpen alyp ketti. Birden jergilikti aýrýhanaǵa jetkizilgen Reseı qaqpashysy túnde komandasymen birge Máskeýge ushyp keldi.
Osy jaıttan keıin kópshilik oıyn toqtatylyp, Chernogorııaǵa tehnıkalyq jeńilis beriledi dep topshylady. Alaıda, arada 35 mınýt ýaqyt ótkende match qaıta jalǵasty. Keıin mundaı sheshimdi ÝEFA prezıdenti Mıshel Platını qabyldaǵany belgili boldy.
Negizgi qaqpashysynan aıyrylǵan Reseı alǵashqy mınýttan bastap oıynshy almastyrdy. Akınfeevtiń ornyna Iýrıı Lodygın shyqty.
Úziliske deıin esep ashylǵan joq. Ekinshi kezeń 15 mınýtqa keshigip bastaldy. Ýaqyt ótken saıyn jankúıerler arasynda tártip buzýshylyqtar kóbeıip, stadıonnyń ár jerinen tútini býdaqtaǵan otshashýlar jıi atyla bastady. Kezdesýdiń 65-mınýtynda Chernogorııa oıynshylary óz aıyp alańynda Aleksandr Kokorındi shalyp jyǵyp, Germanııadan kelgen bas qazy Denız Aıtekın birden 11 metrlik núkteni kórsetti. Bul Reseı oıynshylaryna esep ashatyn tamasha múmkindik edi. Desek te, penaltıdi oryndaǵan Roman Shırokov qaqpashy Výkashın Poleksıchten aılasyn asyra almady. Osy sátte stadıondy basqan tútin qalyńdap, jankúıerler arasyndaǵy qaqtyǵys tipti kúsheıip ketti. Nátıjesinde, oıyn ekinshi márte toqtatyldy. Biraq, bul joly qaıta jalǵaspady. Qazir ÝEFA-nyń tártiptik keńesi osy másele boıynsha jumys júrgizýde. Áleýmettik jelilerde qyzý talqyǵa túsken bul jaıt fýtbolsúıer qaýymnyń basty nazarynda turǵany anyq.
Osy rette mundaı jaısyz oqıǵalardyń sońǵy kezderi jıilep ketkenin aıta keteıik. Máselen, Chempıondar lıgasynyń 2004-2005 jylǵy maýsymynda shırek fınalda «Mılan» men «Inter» oınady. Sol kezde «Mılannyń» qaqpashysy Dıda da dál osyndaı jaǵdaıǵa tap boldy. Nátıjesinde, tóreshi oıyndy sol jerden toqtatyp, «Inter» komandasyna tehnıkalyq jeńilis jazyldy.
Sondaı-aq, 2012 jyldyń 7 qyrkúıeginde Polsha quramasynyń qaqpashysy Pshemyslav Tyton da perotehnıkalyq quraldan zardap shekti. 2014 jylǵy álem chempıonatyna irikteý týrnırinde Polsha sol kezde dál osy Chernogorııamen oınap jatqan edi. О́z qaqpalaryna gol jiberip alǵanyn kótere almaǵan chernogorııalyq jankúıerler alańǵa perotehnıkalyq quraldardy laqtyra bastady. Solardyń biri Tytonnyń dál qasyna túsip, jaryldy. Saldarynan, qaqpashynyń estý qabiletine zaqym keldi.
Chernogorııa jankúıerleri qaqpashyny nysanaǵa alýlaryn munymen toqtatqan joq. 2013 jyldyń 27 naýryzynda atalǵan komanda Anglııaǵa qarsy alańǵa shyqty. Sol kezde aǵylshyndardyń qaqpashysy Djo Hartqa jankúıerler qoldaryna túskenderin laqtyryp, oıynyna kedergi keltirdi. Sońynda ájethana qaǵazyna deıin laqtyryp, shekten shyqty.
Búginde FIFA men ÝEFA osyndaı máselelerdi jiti zerttep, qoldanylatyn jazany kúsheıtý kerektigin jıi aıtyp júr. Tipti jankúıerleriniń basbuzarlyǵy úshin komandany barlyq jarystan shettetý múmkindigi de qaperge alyndy. Mundaı qadamǵa amalsyzdan baratynyn aıtqan resmı ókilder qazir jankúıer máselesi eń ózekti ekenin jetkizdi.
Aıta keteıik, búgin 2016 jylǵy Eýropa chempıonatyna irikteý týrnıri aıasynda taǵy 9 oıyn ótedi. Sonyń biri – Qazaqstan men Islandııa arasyndaǵy match. «Astana-Arena» stadıonynd ótetin oıyn saǵat 21:00-de bastalady.
Elaman Qońyr.
Derek: egemen.kz.
Sýret: sports.ru.