ASTANA. 28 naýryz. Fýtboldan 2016 jylǵy Eýropa chempıonatynyń irikteý týrnıri aıasynda Qazaqstan óz alańynda Islandııamen oınap, 0:3 esebimen jeńildi. Bul týraly egemen.kz habarlady.
Kezdesýdiń alǵashqy on mınýty bizdiń komandanyń basymdyǵymen ótti. Tipti 6-mınýtta esep ashatyn tamasha múmkindikke ıe boldyq. Degenmen, Iýrıı Krasnojannyń shákirtteri sheshýshi sátte múlt ketti. Ýaqyt ótken saıyn belsendiligin arttyrǵan qonaqtar birinshi kezeńniń ortasynda óz oıyn órnegin tapty desek, artyq aıtqandyq emes. Nátıjesinde, 20-mınýtta Islandııanyń ardager oıynshysy Eıdýr Gýdonsen esep ashty. Bul jerde qaqpashymyz Andreı Sıdelnıkovtyń qateligin aıta ketken jón. Qorǵaýshylardyń birinen pas alǵan ol dopty Islandııa oıynshysy Iohann Gýdmýndssonnyń aıaǵyna salyp berdi. Birden alǵa umtylǵan Iohann komandalas áriptesi Gýdonsenge pas shyǵaryp, sońǵysy nátıjeli soqqynyń avtory atandy.
Ekinshi gol standartty jaǵdaıdan keıin soǵyldy. Oıynnyń 32-mınýtynda qonaqtar aıyp soqqysyn oryndaýǵa múmkindik aldy. Gılfı Tor Sıgýrdssonnyń aıyp alańyna asyrǵan dobyna birinshi bolyp Bırkır Bıarnason jetti. Birden basymen soqqy baǵyttaǵan ol qaqpany dál kózdedi.
Úzilisten keıin de oıyn órnegi ózgergen joq. Bizdiń komandanyń shabýyldary kóbine aıaqsyz qalyp jatty. Al Islandııa fýtbolshylary óz alańdarynda júrgendeı tym erkin oınady. Tipti ekinshi goldan keıin aıtarlyqtaı shabýyl da uıymdastyrǵan joq. Sóıtip júrip-aq oıyn tizginin ýystarynan shyǵarǵan joq. Match sońynda Bıarnason ekinshi golyn soǵyp, dýbldyń avtory atandy.
Oıyn barysynda bizdiń fýtbolshylardan Renat Abdýllın men Alekseı Shetkınde gol soǵatyn tamasha múmkindik bolǵan edi. Alaıda, ekeýi de dopty jóndi tebe almady.
Osy jeńisinen keıin Islandııa upaı sanyn 12-ge jetkizdi. Bul kórsetkish boıynsha top basyndaǵy Chehııamen teńesti. Degenmen, chehtar besinshi oıyndaryn endi ótkizedi.
Al Qazaqstan ázirge 1 upaımen toptyń eń sońynda keledi. Búgin bizdiń topta taǵy eki oıyn ótedi. Chehııa óz alańynda Latvııany qabyldasa, Túrkııa Nıderlandyǵa qonaqqa barady. Bizdiń komanda týrnır aıasyndaǵy kelesi oıynyn 12 maýsym kúni óz alańynda Túrkııaǵa qarsy ótkizedi.
Sonymen bas komandamyzdyń taǵy bir súreńsiz oıynyna kýá boldyq. ÝEFA-ǵa múshe bolǵaly ózgergen dúnıe joq. Baıaǵy jartas – sol jartas. Búgingi matchta erekshe aıtatyn nárse, negizgi quramda bes birdeı qazaq fýtbolshysynyń alańǵa shyǵýy. Sondaı-aq, Krasnojan taǵy eki qazaq balasyn oıynǵa qosty. Iаǵnı, búgingi oıynda barlyǵy jeti qaragóz dop tepti. Aıtar dúnıe osy. Basqa kóńil qýantarlyq esh qyzyq joq...
Elaman Qońyr.
Derek: egemen.kz.
Sýret: vesti.kz.
Oıynnyń hattamasy:
Qazaqstan – Islandııa 0:3 (0:2)
28 naýryz. Astana. «Astana-Arena» stadıony. 13 000 kórermen.
Tóreshi: Anastasıos Sıdıropýlos (Grekııa).
Qazaqstan: Andreı Sıdelnıkov, Samat Smaqov, Mark Gýrman (Ermek Qýantaev 67), Renat Abdýllın (Alekseı Shetkın 80), Ilıa Vorotnıkov, Gafýrjan Súıimbaev, Iýrıı Logvınenko, Azat Nurǵalıev (Ulan Qonysbaev 56), Baýyrjan Islamhan, Ashat Taǵybergen, Dáýrenbek Tájimbetov.
Islandııa: Hannes Halldorson, Ragnar Sıgýrdsson, Bırkır Mar Sevarsson, Arı Freır Skýlason, Bırkır Bıarnason, Karı Arnason, Aron Gýnnarsson (Emıl Hollfredsson 72), Gılfı Tor Sıgýrdsson, Iohann Gýdmýndsson, Eıdýr Gýdonsen (Alfred Fınnbogason 84), Kolbeınn Sıgtorsson (Ion Dadı Bodvarsson 70).
Goldar: Eıdýr Gýdonsen 20, Bırkır Bıarnason 32, 90+1.
Eskertýler: Azat Nurǵalıev 55, Ermek Qýantaev 70 – Arı Freır Skýlason 62.