ASTANA. 29 naýryz. Shymkentte jalǵan aksız japsyrylǵan alkogol satýmen aınalysqan 10 adamnan turatyn uıymdasqan qylmystyq toptyń músheleri sottaldy. Bul týraly «7 arna» habarlady.
«Shymkentte jurt dúr silkindirgen qylmystyq prosess aıaqtaldy. Onyń qorytyndysymen uıymdasqan qylmystyq toptyń 10 qatysýshysy ártúrli merzimge jazaǵa kesildi. Is materıaldary boıynsha, olar uzaq ýaqyt boıy jalǵan aksız markaly alkogol ónimderin daıyndap, olardy satýmen aınalysyp kelgen. Aıyptalýshylardyń arasynda sharap zaýytynyń dırektory, Oral qalasynda turatyn bıznesmen, iri saýda júıesiniń býhgalteri jáne 7 birdeı salyq ınspektory bar», - delingen habarlamada.
Sottalýshylar oryndyǵynda 10 aıyptalýshynyń tek 7-i ǵana otyrdy. Sotta tóraǵalyq etýshiniń túsindirýinshe, taǵy 3 salyq ınspektory aýyryp qalýlaryna baılanysty bir jyl boıy úıqamaqta otyrǵan. Al qylmystyq istiń negizgi qatysýshylary: sharap zaýytynyń dırektory, oraldyq jeke kásipker jáne Shymkenttegi iri saýda júıesiniń esepshisi memleketke keltirgen kóptegen mıllıon teńge zalaldary úshin naqty jazalar alǵan.
«Atap aıtqanda, «Vınhaýs» JShS-da 77 mıllıon teńgeniń, «Tótinshi» JShS-da 59 mıllıon teńgeniń alkogol ónimderine jalǵan aksızder daıyndalyp, saýdaǵa shyǵarylǵan. Alkogol ónimderi jalǵan esep-baqylaý jáne aksız qaǵazdarymen taratylǵan. Osyǵan oraı «Vınhaýs» sharap zaýytynyń dırektory Kıterov Dmıtrıı Alekseevıch jalpy jıyntyǵy 8 jyl 6 aıǵa, batysqazaqstandyq jeke kásipker Gýbashev Begınııatuly 7 jylǵa, «Fırkan» JShS-da býhgalter bolyp istegen Rashıdova Zarına 5 jylǵa bas bostandyqtarynan aıryldy», - dep málimdedi Ońtústik Qazaqstan oblystyq qylmystyq ister jónindegi arnaıy mamandandyrylǵan sotynyń sýdıasy Ábınur Qarabaev.
Sýdıanyń aqpary boıynsha, býhgalter ekiqabat bolýyna baılanysty jazasyn keıinirek óteıdi. Barlyq jeti salyq ınspektory sot zalynan bosatyldy. Olar bir jylǵa bostandyqtaryn shekteý jazasyn alǵan. Qazir sharap zaýytyn lısenzııasynan aıyrý máselesi sheshilip jatyr.
Eske sala keteıik, bul qylmystyń shemasyn budan bir jarym jyl buryn qarjy polıseıleri ashqan edi. Olar kásiporynda aýysymnyń resmı jumys ýaqyty bitkennen keıin qosymsha óndiris jelisiniń iske qosylatynyn anyqtaǵan. Sol kezde araq pen konıaktyń ydystaryna jalǵan aksızdik markalar japsyrylyp, satýǵa shyǵarý úshin basqa jaqtarǵa jóneltiletin bolǵan. Jedel izdestirý qyzmetkerleri keń aýqymdy tekserý jumystary barysynda esepke alynbaǵan bir jarym mıllıonan astam alkkogol shynylaryn tapqan. Dál osyndaı qamaýǵa alý jumystary barlyq oblystardyń ortalyqtarynda júrgizildi. Olar boıynsha 10 qylmystyq is qozǵaldy.
«Tekserý kezinde ekinshi sharap zaýytynyń dırektory júregine operasııa jasatqan. Sondyqtan oǵan qatysty qylmystyq is boıynsha bólek óndiris júrgizildi», - dedi Qarabaev. Onyń málimeti boıynsha, bir qylmystyq topty uıymdastyrýshy qolǵa túsken, al taǵy eki kásiporynnyń quryltaıshylary burynǵysynsha izdestirilý ústinde.
Qurysh Nurymbet.