ASTANA. 29 naýryz. Keshe Almatyda «Qazatomprom» Ulttyq kompanııasy» AQ basqarmasynyń tóraǵasy Nurlan Qapparovty aqyrǵy saparǵa shyǵaryp salý rásimi boldy. Bul týraly Almaty qalasy ákimdiginiń baspasóz qyzmeti habarlady.
Qaraly jıynǵa Almaty qalasynyń ákimi Ahmetjan Esimov, Úkimet músheleri, marqumnyń týǵan-týystary men jaqyndary, qoǵamdyq uıymdardyń ókilderi qatysty.
Jıyndy qala ákimi A.Esimov ashyp, Memleket basshysy Nursultan Nazarbaevtyń N.Qapparovtyń kenetten qaıtys bolýyna baılanysty kóńil aıtý bildirgen jedelhatyn oqyp berdi.
Jedelhat mátininde Nurlan Jambylulynyń táýelsizdiktiń alǵashqy jyldarynda tanymal kásipker atanyp, jas tolqynnyń arasynan erekshe kóringeni aıtylǵan. Ol ár jyldary «Qazaqoıl» ulttyq munaı-gaz kompanııasy» JAQ prezıdenti, Qorshaǵan orta jáne sý resýrstary mınıstri, «Qazatomónerkásip» UAK» AQ basqarmasynyń tóraǵasy boldy, sondaı-aq basqa da jaýapty laýazymdarda ózine júktelgen mindetterdi abyroımen atqardy.
«N.Qapparov óziniń mol bilimi men tájirıbesin árdaıym elimizdiń ósip-órkendeýine jumsaǵan daryndy uıymdastyrýshy boldy. Halqymyz onyń esimi men eńbegin umytpaıdy», – delingen jedelhatta.
Eske sala keteıik, «Qazatomprom» Ulttyq kompanııasy» AQ basqarmasynyń tóraǵasy Nurlan Qapparov 26 naýryz kúni Qytaıda saparda júrgeninde Beıjiń ýaqytymen 14Ú30 saǵatta ómirden ótti. Qazanyń sebebi júrektiń kenetten toqtap qalǵany boldy.
Murat Aıtqoja.