ASTANA. 29 naýryz. Semeıde ákesimen birge ózen jaǵasyna baryp, muzdyń ústinde oınap júrgen 5 jasar qyz sýǵa batyp ketti. Bul týraly «7 arna» habarlady.
Osy oqys oqıǵadan keıin qutqarýshylar Ertistiń boıyn jaǵalaǵan balyqshylarǵa jappaı eskertý jasap jatyr. Biraq olardyń muz ústinde balyq aýlaýdy sáýirge deıin jalǵastyratyn oılary bar.
Qazir Ertistiń muzy aıtarlyqtaı juqarǵan. Qalyndyǵy shamamen 10 sm. Onyń ústine shyqpaq túgili, jaǵasynda júrýdiń ózi qaýipti. Biraq, munda kún saıyn júzdegen balyqshy kelip, oıyq oıady eken.
«2014 jyly osy sáýir aıynnyń basynda Besqaraǵaı aýylynyń Glýhovka aýylynda eki balyqshy batyp ketti. Mundaı tótenshe jaǵdaılardy boldyrmas úshin balyqshylarmen áńgime ótkizip jene eskertý jasap osyndaı jumystardy atqaryp jatyrmyz.
Degenmen, Ertiske kelip balyq aýlaýdy ermek qylatyndar ázirge esh nárseden qaýiptenbeıtin syńaıly. Olardyń oıynsha, sáýirge deıin balyq aýlaýǵa bolady», - dedi Semeı qalalyq sýdan qutqarý qyzmetiniń mamany Tasbolat Kóshkinbaev.
Mamandar eskertýdi jaıdan jaı jasap otyrǵan joq. 22 naýryz kúni muz ústine shyqqan 5 jasar bala sý túbine batyp ketipti. Ákesi qutqaryp úlgermegen. Kishkentaı qyzdyń denesin qutqarýshylar alyp shyǵady. Mamandar bıyl Ertistiń arnasy burylyp balyqshylar otyrǵan aýmaqqa qaýip tóndirip turǵanyn aıtyp dabyl qaǵýda. Sondyqtan aldyn alý sharalaryna balyqshylardyń baǵynýy tıis ekenin eskertip otyr.
Murat Aıtqoja.