ASTANA. 29 naýryz. Fýtboldan Islandııa quramasynyń ardager fýtbolshysy, keshegi oıynda Qazaqstan qaqpasyna soǵylǵan alǵashqy goldyń avtory Eıdýr Gýdonsen bizdiń komandanyń oıyny týraly pikirin bildirdi. Bul týraly sports.kz habarlady.
Qazaqstandyq BAQ ókilderine bergen suhbatynda ol oıynnan alǵan áserimen bólisip: «Aýa raıynyń salqyndyǵy jeńiske jetýimizge kedergi bola almady. Eń bastysy, biz aldymyzǵa qoıǵan maqsatty oryndadyq. Meniń ulttyq qurama úshin gol soqpaǵanyma uzaq ýaqyt bolypty. Qazaqstanmen oıynda sol dataǵa ózgeris engizgenim úshin qýanyshtymyn», – dedi.
«Qazaqstan oıynshylary óte óreskel qatelikter jiberdi. Tipti tegis jerde súrinip júr deýge de bolady. Baqytymyzǵa oraı, sol qatelikterdi paıdamyzǵa jarata aldyq. Jasyratyny joq, oıynnyń aldynda alań ıeleri birinshi nómirmen oınaıdy dep oıladyq. Biraq, óz basym sonshalyqty qysym baıqaı almadym», – deıdi kezinde «Chelsı» men «Barselona» sapynda dop tepken tájirıbeli oıynshy.
Ekinshi goldyń oıyn taǵdyryna aıtarlyqtaı áser etkenin aıtqan Gýdonsen: «Esep bizdiń paıdamyzǵa 2:0 bolǵannan keıin qarsylastarymyzǵa qaıtadan jınalýǵa esh múmkindik bergen joqpyz. Soǵan qaramastan, bul oıyn ońaı bolǵan joq. Al iri eseppen jeńiske jetýimiz bizdiń tolyq múmkindigimizdi kórsetti deı almaımyn», – dedi.
Aıta keteıik, keshe «Astana-Arena» stadıonynda Islandııa bizdiń quramany 3:0 esebimen jeńdi. Oıyn fýtboldan 2016 jylǵy Eýropa chempıonatyna irikteý týrnıri aıasynda ótti.
Elaman Qońyr.
Derek: sports.kz.
Sýret: kapital.kz.