Keshe Ortalyq kommýnıkasııalar qyzmetinde Bilim jáne ǵylym vıse-mınıstri E.Imanǵalıev, Densaýlyq saqtaý jáne áleýmettik damý vıse-mınıstri B.Nurymbetov, L.N.Gýmılev atyndaǵy EUÝ rektory E.Sydyqovtyń qatysýymen «Indýstrııalandyrýdy kadrlarmen qamtamasyz etý» taqyrybynda baspasóz máslıhaty ótti.
Konferensııa barysynda vıse-mınıstr E.Imanǵalıev joǵary jáne joǵary oqý ornynan keıingi bilim salasynda jobalardy zamanǵa saı kadrlarmen qamtý ınnovasııalyq sıpattaǵy bilim berý baǵdarlamalary esebinen júrgiziletindigin aıtyp, 2015-2017 jyldary bilim berý baǵdarlamalaryn ázirleýge ár jyl saıyn 962,1 mln. teńge qarjy qarastyrylǵandyǵyn alǵa tartyp, respýblıkalyq bıýdjet esebinen 2015 jyly sheteldik ǵalymdardy shaqyrýǵa 998,8 mln. teńge mólsherinde, sondaı-aq akademııalyq utqyrlyqqa 590 mln. teńge bólingenin málim etti.
«2015 jyldyń 1 qyrkúıeginen bastap oqý prosesine engiziletin oqý baǵdarlamalaryn kelisý boıynsha jumys berýshilermen, kásipodaqtarmen baılanys artýda. On iriktelgen kolledjderdiń altaýy Dúnıejúzilik bank qarjysy esebinen iske asyrylatyn tehnıkalyq jáne kásiptik bilimdi jańǵyrtý jobasy boıynsha grant alýshylar bolyp tabylady. Osy joba aıasynda kolledjder 425 mln. teńge turatyn jabdyqtarmen jaraqtalǵan», – dedi E.Imanǵalıev.
«Nurly Jol» Jańa Ekonomıkalyq Saıasatyn jáne Qazaqstan Respýblıkasyn ındýstrııalyq-ınnovasııalyq damytýdyń 2015-2019 jyldarǵa arnalǵan memlekettik baǵdarlamasyn iske asyrý maqsatynda bazalyq joǵary oqý oryndarynyń jáne kolledjderdiń damý baǵdarlamasy ázirlengenin de atap ótti.
Osy baǵdarlamaǵa jáne elimizdi ındýstrııalandyrýdyń ekinshi besjyldyǵynyń basymdyqtaryna sáıkes 2015-2017 jyldary bilikti kadrlar daıarlaý iske asady eken. Memlekettik baǵdarlamanyń basym salalary: metallýrgııa, munaı-gaz hımııasy, elektrenergetıka, jeńil jáne tamaq ónerkásibi, mashına jasaý, ınformasııalyq-kommýnıkasııalyq tehnologııalar, taǵy basqa.
Al Densaýlyq saqtaý jáne áleýmettik damý mınıstrliginiń derekterine sáıkes, 2015-2019 jyldary aralyǵynda jalpy sany 257 óńirlik jáne respýblıkalyq jobalar iske asyrylatyn bolady. Mundaǵy kadrlarǵa degen jalpy qajettilik búgingi kúnde 46,6 myń adamdy qurap otyr eken. Máselen, tehnıkalyq jáne kásiptik bilim berý salasynda «Kásipqor» holdıngi men 10 kolledj arasynda damytý isi boıynsha sharttar jasalǵan.
2017-2018 jyldarda 10 kolledjge ári qaraı engizý úshin jumys berýshilerdiń qatysýymen taǵy 16 oqý baǵdarlamasy ázirlenbek. 2015 jyldan bastap 2 kolledj osy baǵdarlamalardy oqý prosesine engizedi.
2015-2016 oqý jylynyń basynan bastap bazalyq joǵary oqý oryndarynda magıstranttar jańa bilim berý baǵdarlamalary boıynsha bilim alatyn bolady. Zerthanalardy qurýǵa 10 mlrd. teńge qarastyrylsa, onyń 3 mlrd. teńgesi sońǵy eki jylda, 4 mlrd. teńge 2017 jyly ıgeriletin kórinedi.
Raýshan TÁÝIRHANQYZY,
jýrnalıst.