ASTANA. 14 qazan. Búgin Atyraýda 68 jasqa qaraǵan shaǵynda Qazaqstannyń burynǵy premer-mınıstri Nurlan Balǵymbaev qaıtys boldy. Bul týraly egemen.kz habarlady.
Balǵymbaev Nurlan О́tepuly 1947 jyly 20 qarashada Atyraý qalasynda týǵan. 1973 jyly Qazaq polıtehnıkalyq ınstıtýtynyń munaı jáne gaz fakýltetin taý-ken ınjeneri mamandyǵy boıynsha bitirdi. Sondaı-aq, 1992-1993 jyldary Massachýsets ýnıversıtetiniń (AQSh) tyńdaýshysy boldy.
Eńbek jolyn 1964 jyly Atyraý (qazirgi Mańǵystaý) oblysynyń Quryq kentinde burǵylaýshynyń kómekshisi bolyp bastaǵan Nurlan Balǵymbaev ár jyldarda jerasty jóndeý operatory, munaı shyǵarý jónindegi operator, skvajınalardy jerasty jóndeý sheberi syndy jumystarmen qatar, óndiristik qyzmet kórsetý bazasy bastyǵynyń orynbasary, bas ınjener, KSRO Munaı jáne gaz ónerkásibi mınıstrliginiń bas basqarmalarynda bastyqtyń orynbasary qyzmetterin abyroımen atqardy. Sondaı-aq, «Shevron» kompanııasynda eńbek etti.
Odan bólek, 1994-1997 jyldary Qazaqstan Respýblıkasy Munaı jáne gaz ónerkásibi mınıstri, «Qazaqoıl» ulttyq munaı-gaz kompanııasynyń prezıdenti, 1997-1999 jyldary Qazaqstan Respýblıkasynyń premer-mınıstri, 1999 jyldan «Qazaqoıl» ulttyq munaı kompanııasynyń prezıdenti, Qazaqstan úkimetiniń múshesi, 2002 jyldan «Qazaqstandyq munaı ınvestısııalyq kompanııasy» AQ prezıdenti, 2007 jyldan Qazaqstan Prezıdentiniń keńesshisi, Kaspıı teńizi resýrstaryn paıdalaný máseleleri jónindegi Qazaqstannyń arnaıy ókili, 2009 jyldyń jeltoqsanynan bastap «QazMunaıGaz» salynyp jatqan kásiporyndarynyń ákimshiligi» JShS bas dırektory qyzmetterin atqardy.
II dárejeli «Barys» ordenimen marapattalǵan (1999 j).
Marqumdy jerleý rásimi 16 qazanda Atyraý qalasynda ótedi.
Elaman Qońyr.
Derek: egemen.kz.
Sýret: facebook.com.