О́SKEMEN. 14 qazan. Shyǵys Qazaqstan oblysynyń ákimi Danıal Ahmetovtiń ókimimen Jarma aýdanynyń ákimi bolyp Nurlan Battashuly Sydyqov taǵaıyndaldy. Aktıvke tanystyrý barysynda oblys ákimi jańa basshyny aýdannyń erekshelikterin eskere otyryp taǵaıyndaǵanyn jetkizdi. Bul týraly egemen.kz tilshisi habarlady.
Nurlan Sydyqov 1958 jyly Shyǵys Qazaqstan oblysynyń Abaı aýdanynda týǵan. 1980 jyly Qazaq polıtehnıkalyq ınstıtýtyn taý-ken ınjeneri mamandyǵy boıynsha, 2004 jyly Qazaq zań akademııasyn zańger mamandyǵy boıynsha bitirgen. Tehnıka ǵylymynyń kandıdaty.
Eńbek jolyn Semeı qalasyndaǵy «Altaızoloto» taý-ken baıytý kombınatynyń jobalaý-qurastyrý bóliminiń mehanıka-energetıkalyq bıýrosynyń ınjeneri bolýdan bastady. Atalǵan kásiporynda túrli qyzmette 1991 jylǵa deıin eńbek etti. 1993 jylǵa deıin Semeı qalasynyń turǵyn úı-kommýnaldyq sharýashylyǵy bóliminiń meńgerýshisi, qala ákimdiginde apparat jetekshisi boldy. 2011 jylǵa deıin jeke sektorda túrli qyzmette jumys istese, 2011 jyldyń tamyz aıynan bastap oblystyq «Ertis» áleýmettik-kásipkerlik korparasııasy» ulttyq kompanııasy» AQ Basqarma tóraǵasy boldy. 2013 jyldyń maýsym aıynan osy ýaqytqa deıin Besqaraǵaı aýdanynyń ákimi qyzmetin atqardy.
Al Jarma aýdanynyń burynǵy ákimi Ánýarbek Muhtarhanov bıylǵy jyly 23 qyrkúıekte oblystyq ardagerler keńesiniń tóraǵasy bolyp saılanǵan bolatyn.
Dýman Anash.
Derek, sýret: egemen.kz.