Burnaǵy kúni fýtboldan 2016 jylǵy Eýropa chempıonatyna irikteý týrnıri sheńberinde Qazaqstan Rıgada Latvııamen kezdesti. Tartysty oıyn nátıjesinde ulttyq quramamyz 1:0 esebimen jeńiske jetti.
Match alań ıeleriniń shabýylymen bastaldy. 12-mınýtta Latvııa sapynan Artýr Zıýzın oıyndaǵy alǵashqy soqqyny jasady. Alaıda, dop qaqpadan qıys ketti. Artynsha Samat Smaqov bastaǵan bizdiń jigitter qarymta shabýyl uıymdastyryp, Gafýrjan Súıimbaev qarsylastar qaqpasyn nysanaǵa alyp kórdi. Bul joly latyshtardyń qaqpashysy sheberligimen kózge tústi. Alma-kezek shaýylmen órbigen birinshi taımda esep ashylǵan joq.
Ekinshi taımnyń alǵashqy mınýttarynda taǵy da Latvııa oıynshylary belsendi qımyldady. Alaıda, ýaqyt óte Iýrıı Krasnojannyń shákirtteri shıraqtyq tanytyp, qarqyndaryn kúsheıtti. Komandamyzdyń kezekti shabýyldarynyń birinde Islambek Qýat úsh qorǵaýshynyń ortasynan sytylyp shyǵyp, esep ashty. Bul kezdesýdiń 65-mınýty edi. Qalǵan ýaqytta tablodaǵy nátıje ózgermeı, Qazaqstan osy irikteý týrnırindegi alǵashqy jeńisine qol jetkizdi.
Osymen kelesi jyly Fransııada ótetin qurlyqtyq dop dodasyna irikteý saıysy máresine jetti. «A» tobynda synǵa túsken Qazaqstan 5 upaımen týrnırdi 5-orynda aıaqtady. Bizdiń topta birinshi jáne ekinshi oryn alǵan Chehııa men Islandııa Eýropa chempıonatyna tikeleı joldama aldy. Sondaı-aq, úzdik úshtikten kóringen Túrkııa quramasy da Fransııaǵa baratyn boldy. Ol barlyq toptaǵy úshinshi oryn alǵan komandalar arasynda úzdik nátıje kórsetkeni úshin osyndaı jetistikke jetip otyr. ÝEFA bekitken ereje boıynsha mundaı komandany anyqtaý kezinde óz tobynda sońǵy oryn alǵan quramamen ótkizgen eki oıynnyń upaıy esepke alynbaıdy.
Osy rette túrikterdiń jeńisine Latvııa – Qazaqstan matchynyń nátıjesi tikeleı áser etkenin atap ótken jón. Sebebi, bizdiń komanda latyshtardy jeńý arqyly topta besinshi satyǵa kóterilip, sońǵy orynǵa Latvııa jaıǵasty. Soǵan oraı Túrkııa tek eki upaı joǵaltty. О́ıtkeni, túrik aǵaıyndarymyz eki rette de Latvııamen teń oınaǵan bolatyn. Al eger sońǵy oryndy Qazaqstan alǵan jaǵdaıda Anadoly eli alty upaıdan aıyrylatyn edi.
Elaman QOŃYR,
«Egemen Qazaqstan».