О́SKEMEN. 15 qazan. О́skemende «Torpedo» hokkeı komandasynyń hokkeıshisi Evgenıı Fadeevtiń 30 jastaǵy áıeli Marııa óz páterinde kisi qolynan qaza boldy. Bul týraly egemen.kz tilshisi habarlady.
Ázirge polısııa qyzmetkerleri oryn alǵan oqıǵa týraly tarqatyp aıtpasa da, Marııa Fadeeva tonaý maqsatynda óltirilýi múmkin degen boljamdar bar.
Marqumnyń týystarynyń biri áleýmettik jelige jarııalaǵan jazbasynda ony óz páterinde torýyldap, balalardyń úıde joqtyǵyn, jalǵyz ekenin bilgendikten óltirgenin jáne úıdegi barlyq aqsha men kartochkalardy alyp ketkenin málimdegen. Qalalyq ınternet-forýmdarynyń birinde áıeldi tunshyqtyryp óltirgeni jaıly da sóz bolyp otyr.
«Bul oqıǵa boıynsha QR Qylmystyq Kodeksiniń 1 bóliminiń 99 baby boıynsha qylmystyq is qozǵaldy. Asa aýyr qylmysty ashý sharalary boıynsha keshendi sharalar júrgizilýde», – dedi oblystyq ishki ister departamenti baspasóz qyzmetiniń bastyǵy Baqytjan Torǵaev.
Marııa Fadeeva – qazaqstandyq belgili hokkeı jattyqtyrýshysy Vladımır Belıaevtiń qyzy. Ol ózi de sportpen belsendi túrde shuǵyldanǵan. Kórkem gımnastıkada birshama tabystarǵa jetken. S.Amanjolov atyndaǵy ShQMÝ-dy bitirip, jattyqtyrýshy bolyp jumys istegen. Marııanyń týǵan aǵasy Maksım de áke jolyn jalǵap, hokkeıshi boldy. Kúıeýi de belgili hokkeıshilerdiń biri. Sońǵy jyldary Astanada turdy. Evgenıı Fadeev astanalyq «Barys» komandasy sapynda oınady. Marııa eki bala tárbıeledi. Úlken uly jaqynda ǵana jeti jasqa toldy.
Jarty jyldaı ýaqyt buryn Evgenıı Fadeev otbasymen О́skemenge qaıta oralyp, jergilikti «Torpedo» komandasynyń kapıtany bolǵan edi. Taıaýda ǵana klýbtyń baspasóz qyzmetine bergen suhbatynda hokkeıshi oıynnan tys ýaqytynyń barlyǵyn otbasyna arnaıtynyn aıtqan bolatyn.
Dýman Anash.
Derek: egemen.kz.
Sýret: ýk.kz.