ASTANA. 15 qazan. Reseı Federasııasynyń prezıdenti Vladımır Pýtınniń Qazaqstanǵa memlekettik sapary aıasynda keńeıtilgen quramdaǵy kelissózder ótti. Bul týraly akorda.kz habarlady.
Qazaqstan Prezıdenti Reseı bizdiń elimizdiń strategııalyq seriktesi ári odaqtasy ekenin atap ótti.
«Biz Eýrazııalyq ekonomıkalyq odaqta ózara yqpaldasyp otyrmyz. Elderimiz ekijaqty baılanystar aıasynda ekonomıka, ǵylym jáne gýmanıtarlyq salalardaǵy jobalardy tabysty júzege asyrýda. Soǵan oraı biz eki memlekettiń yntymaqtastyǵyna qosymsha serpin beretin osy jolǵy kezdesýge aıryqsha mán beremiz», – dedi Elbasy.
Nursultan Nazarbaev ózara taýar aınalymy kóleminiń qazirgi quldyraýy álemdik ekonomıka damýynyń kezeńdiligine jáne negizgi eksporttyq taýarlar baǵasynyń tómendeýine baılanysty ýaqytsha qubylys ekenine nazar aýdardy.
«Biz ulttyq deńgeıde de, EAEO aıasynda da úılesimdi jedel sharalar qabyldaý qajettigin túsinemiz. Ekonomıkalyq máselelerdiń saldaryn jeńildete túsý úshin rezervterdi paıdalanǵan jón. Eýrazııalyq ekonomıkalyq odaq Uıymnyń barlyq múshesiniń teńquqylyǵy jaǵdaıynda qyzmet ete alady, elderimizdiń ókilderi barlyq elderdiń múddesine oraı jáne ortaq ekonomıkalyq ustanymdarǵa sáıkes jumys isteýi tıis», – dedi Qazaqstan Prezıdenti.
V.Pýtın ekijaqty qarym-qatynastardyń barlyq, sonyń ishinde saıasat, ekonomıka jáne qaýipsizdik baǵyttarynda tıimdi damyp jatqanyn aıtty.
«Biz statıstıkalyq kórsetkishterdiń azdap tómendegenin baıqap otyrmyz, biraq naqty kólem turǵysynan is júzinde ózgeris joq. Biz 2013 jyly qabyldanǵan, 2015 jyly merzimi aıaqtalatyn ekijaqty jospar negizinde jumys istep jatyrmyz. Qazir bizdiń áriptesterimiz 2016-2018 jyldarǵa arnalǵan birlesken jumys josparyn ázirleýde. Ony jyl aıaǵyna deıin bekitemiz dep úmittenemin», – dedi Reseı prezıdenti.
V.Pýtın Reseıdiń Qazaqstan ekonomıkasyna salǵan ınvestısııalary 9 mıllıard dollardan asqanyn da atap ótti. Qazaqstan munaıynyń syrtqy naryqqa arnalǵan negizgi kólemi Reseı aýmaǵy arqyly ótedi. Sonymen qatar, Reseı prezıdenti joǵary tehnologııalar, ónerkásip, aýyl sharýashylyǵy jáne energetıka salalarynda birlesken iri jobalar bar ekenine nazar aýdardy.
Aıdar О́risbaev.
Derek, sýret: akorda.kz.