Memleket basshysy Nursultan Nazarbaev VIII Astana ekonomıkalyq forýmyna qatysýǵa kelgen Lıtva Premer-mınıstri Algırdas Býtkıavıchıýspen kezdesti, dep habarlady Prezıdenttiń baspasóz qyzmeti.
Kezdesý barysynda ekijaqty, sonyń ishinde saýda-ekonomıkalyq jáne ınvestısııalyq salalardaǵy ózara yqpaldastyq máseleleri talqylandy.
Elbasy 2007-2009 jyldardaǵy jahandyq qarjy-ekonomıkalyq daǵdarysqa jaýap retinde uıymdastyrylǵan forýmǵa qatysatyny úshin Lıtva Premer-mınıstrine alǵys aıtty.
– Forýmǵa 90 elden kelgen úsh myń delegat qatysady. Biz Qazaqstannyń ınfraqurylymdyq jáne ındýstrııalyq damý turǵysynan qabyldap jatqan sharalary men júzege asyryp jatqan ózge de baǵdarlamalary týraly aıtpaq nıettemiz, – dedi Memleket basshysy.
Nursultan Nazarbaev eki eldiń arasyndaǵy saıası únqatysý men ekonomıkalyq ynty-
maqtastyqtyń deńgeıi joǵary ekenin atap ótti.
– Lıtvamen árqashan jaqsy qarym-qatynasta boldyq. Sizdiń saparyńyz yntymaqtastyqty odan ári keńeıtýge qyzmet etedi dep úmittenemin, – dedi Memleket basshysy.
A.Býtkıavıchıýs ekijaqty qarym-qatynastardy nyǵaıtýǵa jáne damytýǵa qosqan eleýli úlesi úshin Qazaqstan Prezıdentine alǵys aıtty.
– Qazaqstan Lıtvanyń Ortalyq Azııadaǵy mańyzdy seriktesi bolyp sanalady, – dep atap ótti A.Býtkıavıchıýs.
Lıtva Premer-mınıstri, sondaı-aq, Nursultan Nazarbaevty el Prezıdenti laýazymyna qaıta saılanýymen quttyqtap, Qazaqstannyń alǵa qoıǵan barlyq maqsattaryna jetetinine senim bildirdi.