Almatyda «Atakent» iskerlik yntymaqtastyq ortalyǵynda osymen 22-shi ret dástúrli «KIHE-2015 «Densaýlyq saqtaý» halyqaralyq kórmesi úlken tabyspen ótti. Oǵan bıyl álemniń 28 elinen 300-ge jýyq kompanııa óz ónimderin usyndy. Kórmege Ázerbaıjan, Grýzııa, Mysyr jáne Izraıl elderiniń medısına salasynda qyzmet atqaratyn kompanııalary birinshi ret qatysyp otyr.
Kórmeniń ashylý saltanatynda Qazaqstanda medısına salasyndaǵy eń iri tájirıbe almasý alańdarynyń biri ekenin atap ótken elimizdiń Densaýlyq saqtaý jáne áleýmettik damý vıse-mınıstri Alekseı Soı oǵan medısınaǵa arnalǵan ónimder shyǵaratyn otandyq jáne sheteldik óndirýshiler qatysatynyn jetkizdi. Sonymen qatar, jyl saıyn ótkiziletin bul kórme densaýlyq saqtaý salasyndaǵy jańa tehnologııalarmen tanysýǵa, emdeýdiń jańa ádisterin úırenýge jáne densaýlyq saqtaý salasynyń damý keleshegin anyqtaýǵa múmkindik beretinin tilge tıek ete kele, Qazaqstan medısınasy birqatar salalar boıynsha álemdik deńgeıge kóterilgenin, sonyń arqasynda elimizde ishki, syrtqy medısınalyq týrızmniń jaqsy damyp kele jatqanyn, Astana, Almaty sekildi elimizdiń iri medısınalyq ortalyqtaryna oblystardan kelip em alyp jatqandar, sondaı-aq, Qazaqstanda syrtqy medısınalyq týrızmniń de damı bastaǵanyn alǵa tartty. О́ıtkeni, bul qalalardaǵy zamanaýı klınıkalarda joǵary bilikti mamandar eńbek etedi.
«Kórshi memleketterden elimizge kelip, em-dom alyp jatqandar jeterlik. О́ıtkeni, Qazaqstanda emdelý Eýropa elderinen eki ese, al Túrkııaǵa qaraǵanda úsh ese arzan. Onyń ústine Qazaqstan medısınanyń birqatar salalary – kardıohırýrgııa, neırohırýrgııa jáne ekstrakorporaldy uryqtandyrý baǵyttary boıynsha álemdik deńgeıge kóterilip, óz aımaǵynda baǵyt-baǵdar silteıtin dárejege jetip qaldy», – dedi A.Soı. Bıylǵy kórmeniń ereksheligi – alǵash ret Vengrııa, uzaq úzilisten keıin – Úndistan jáne jyl saıynǵy qatysýshylar Germanııa, Qytaı jáne Reseı óz stendterin usyndy. Otandyq densaýlyq saqtaý salasynyń ekspozısııasy Qazaqstan Respýblıkasy Prezıdentiniń Is basqarmasynyń Almaty qalasyndaǵy Ortalyq klınıkalyq aýrýhanasy, Almaty qalasy Reprodýksııalyq medısına ınstıtýty, sondaı-aq, quramyna kiretin barlyq ǵylymı ortalyqtardyń medısınalyq qyzmetteri kórsetiletin «Ulttyq medısınalyq gospıtal» AQ-ty jáne taǵy basqalardy qamtydy. Kórme sheńberinde «Emdeý-saýyqtyrý jáne medısınalyq týrızm» taqyryby ekinshi jyl qatarynan bólek ekspozısııa bolyp usynyldy. Kórmeniń taǵy bir qyzyqty bólimi – «Estetıkalyq medısına» seksııasy. Ol sulýlyq ındýstrııasy, estetıkalyq medısına jáne plastıkalyq hırýrgııa salasynyń jetekshi óndirýshileri men ókilderin usyndy. Jobaǵa Densaýlyq saqtaý jáne áleýmettik damý mınıstrligi, Almaty qalasy ákimdigi, Almaty qalasy densaýlyq saqtaý basqarmasy, Densaýlyq saqtaý jáne áleýmettik damý mınıstrliginiń Medısınalyq jáne farmasevtıkalyq qyzmetti baqylaý komıteti, «Ulttyq medısınalyq holdıng» AQ, Qazaqstandaǵy halyqaralyq farmasevtıkalyq óndirýshiler qaýymdastyǵy jáne Qazaqstan Respýblıkasy Ulttyq medısına qaýymdastyǵy resmı túrde qoldaý kórsetti.
Gúlzeınep SÁDIRQYZY, «Egemen Qazaqstan».