Italııanyń Lıdo dı Ezolo qalasynda Venesııa merııasynyń uıymdastyrýymen ótken balalardyń dástúrli halyqaralyq HIII folklor jáne kórkemóner festıvaline qazaqstandyq 10 óren qatysyp qaıtty. Olardyń qatarynda Almatydaǵy «Zerde» mektebiniń 1-synybyn aıaqtap otyrǵan 7 jastaǵy Nuraıa Esdáýlet bar.
Qazaq búldirshini Halyqaralyq kórkemsýret kórmesine «Naýryz toıy» jáne «Jelqaıyqtar» atty eki týyndysymen qatysyp, festıvaldiń altyn medali men dıplomyn jeńip alyp keldi. Sondaı-aq, festıval baǵdarlamasynyń býkletine alýan ulttyń ónerpazdarymen qatar Nuraıanyń da dombyra tartyp otyrǵan fotosýreti shyqqan. 3 jasynan qolyna qylqalam ustaǵan balǵyn ónerpazdyń sýretterindegi boıaý sıqyryn sezinýi, shyǵarmalarynda óz jan dúnıesin, oı-kózqarasyn berýge umtylysy qazylar alqasynyń erekshe nazaryna iligip, júzden ozǵan júıriktigi tanyldy.
Talantty baldyrǵandy beıneleý ónerine baýlyp júrgen muǵalimi, ataqty sýretshi Toqbolat Toǵysbaevtyń zaıyby Raýshan Aqberdıevanyń aıtýynsha, sezimtaldyǵy men baıqaǵyshtyǵy týa bitken asa eńbekqor daryn retinde onyń bolashaǵynan úlken úmit kútýge bolady. «Kórme kezinde Nuraıanyń salǵan sýretterine qyzyǵyp, satyp alǵysy kelip, qymbat baǵa usynýshylar az bolǵan joq. Alaıda, biz óz ónerpazymyzdyń top jarǵan tyrnaqaldy týyndylaryn saýdaǵa salýdy jón kórmedik», dedi ustazy.
Nuraıa Esdáýlet buǵan deıin de áleýmettik jelilerge salǵan sýretterimen ónertanýshylardy eleńdetken bolatyn.
Aınash ESALI,
«Egemen Qazaqstan».
ALMATY.