ATYRAÝ. 22 mamyr. Investısııalar jáne damý mınıstrligi tehnıkalyq retteý jáne metrologııa komıteti tóraǵasynyń buıryǵymen Atyraý oblysy boıynsha departamentiniń basshysy laýazymyna Dııas Jánibekov taǵaıyndaldy. Bul týraly egemen.kz tilshisi habarlady.
Jańa basshy 1986 jyly Batys Qazaqstan oblysynda týǵan. Astanadaǵy Gýmılev atyndaǵy Eýrazııa ulttyq ýnıversıtetiniń túlegi, ekonomıst jáne quqyqtaný mamandyqtaryn meńgergen. «Bolashaq» halyqaralyq baǵdarlamasy aıasynda Italııa astanasy – Rımdegi «La Sapıensa» ýnıversıtetinde bilimin jetildirip, áleýmettik ǵylymdar jáne gýmanıtarlyq qatynastar magıstri atanǵan.
Eńbek jolynda Indýstrııa jáne jańa tehnologııalar mınıstrliginde departament dırektorynyń orynbasary, Batys Qazaqstan oblystyq kásipkerlik jáne ónerkásip basqarmasynyń basshysy, Indýstrııa jáne saýda mınıstrliginde bas sarapshy sekildi laýazymdy qyzmetter atqarǵan. Sońǵy úsh jyldan beri Atyraý oblysy ákimi apparatynda ınvestısııa jáne jańa tehnologııalar bóliminiń basshysy boldy.
Joldasbek Shópeǵul.
Derek, sýret:egemen.kz.