ASTANA. 22 mamyr. Memleket basshysy kópfýnksıonaldy «Talan Taýer» jáne «Ábý-Dabı Plaza» keshenderiniń qurylys alańynda, sondaı-aq, «Jasyl kvartal» turǵyn úı kesheniniń tanystyrý bólmesinde (shoý-rým) boldy. Bul týraly akorda.kz habarlady.
Elbasy júrgizilip jatqan jumystardyń barysymen tanysyp, nysan qurylysshylarymen áńgimelesti.
«Talan Taýer» kópfýnksıonaldy kesheni jobasyna 157 oryndyq qonaq úı, aýdany 8 300 sharshy metr saýda galereıasy, A synypty bıznes-ortalyq jáne turǵyn jaılar kiredi. Nysan qurylysyna 40-tan asa merdigerlik uıym tartylǵan. Munda Qazaqstanda birinshi ret «jasyl» tehnologııalar – «jasyl» shatyr, energııa turǵysynan tıimdi lıftiler, energııa saqtaýshy áınekter, jańbyr sýyn qaıta paıdalaný qondyrǵysy qoldanylady. Parkıng jáne elektromobılderge arnalǵan zarıadtaýshy stansalar, arnaýly oryndar, velosıpedshilerge arnalǵan kıim sheshetin jáne jýynatyn oryndar bolady.
«Ábý-Dabı Plaza» kesheni – túrli maqsattaǵy bloktardan quralǵan kópfýnksıonaldy záýlim ǵımarat. Atap aıtqanda, oǵan keńseler, qonaq úı jáne turǵyn úı kesheni kiredi. Qurylystyń jalpy aýdany – 500 myń sharshy metr.
«Jasyl kvartal» kesheni jobasy energııa saqtaýdyń jańa tehnologııalaryna negizdelgen. 20 gektardan astam aýmaqta kópqabatty úıler, keńse ǵımarattary, parkıng, sondaı-aq, sýbtropıkalyq mıkroklımaty, ekzotıkalyq dendrosaıabaǵy bar shaǵyn kól, bıokúmbezdi mádenı jáne áleýmettik ınfraqurylym nysandaryn salý josparlanǵan.
Munda sýǵarylmaıtyn landshaft júıesi, «qaldyq sýdy» kommersııalyq ǵımarattarda qaıta paıdalaný, qoqysty ortalyqtandyrylǵan jınaý júıesi, «aqyldy» avtoturaq júıesi, velokólikterdi qoıýǵa arnalǵan oryndar, eldegi elektrmen zarıadtaıtyn alǵashqy tolyqqandy stansa qarastyrylǵan.
Elaman Qońyr.
Derek, sýret: akorda.kz.