Sharaına

Áskerı mıssııanyń merzimi uzartyldy AQSh prezıdenti Barak Obama Aq úıde sóılegen sózinde amerıkalyq 9,8 myń áskerı qyzmetshi Aýǵanstanda kelesi jyldyń sońyna deıin qalatynyn atap ótti. AQSh áskerleri Aýǵanstannan bıylǵy jyly birtindep shyǵarylýy tıis bolatyn. Barak Obama, sondaı-aq, AQSh áskerleriniń Aýǵanstandaǵy mıssııasy ózgermeıtinin jáne olar aýǵan áskeriniń terrorızmge qarsy kúres júrgizýine kómektese beretinin málimdedi. Buǵan qosa ol óziniń prezıdenttik merzimi aıaqtalǵanǵa deıin AQSh bul elde 5,5 myńdaı ásker ustaıtynyn da jetkizdi. Amerıkalyq áskerıler Kabýl qalasynyń soltústigindegi Bagram bazasynda, eldiń ońtústigindegi Jalalabad qalasynda jáne ońtústiktegi Kandagar aýdanynda ornalasqan. AQSh áskerıleri negizinen aýǵan áskerlerin búginde yqpaly artyp bara jatqan «Talıban», «Ál-Kaıda», «Islam memleketi» ekstremıstik uıymdarymen kúreske daıyndaıdy. Prezıdenttiń aıtýynsha, áskerdi qaldyra turý sheshimi ulttyq qaýipsizdik salasyna qatysty sarapshylarmen jáne Aýǵanstan bıligi ókilderimen kezdese otyryp qabyldanǵan. Qaýipsizdik keńesine ýaqytsha múshe boldy Ýkraına, Egıpet, Japonııa, Senegal jáne Ýrýgvaı memleketteri BUU-nyń on bes elden turatyn Qaýipsizdik keńesine ýaqytsha eki jylǵy múshe bolyp saılandy. Bul elderdiń eshqaısysyna básekelester bolǵan joq. Ýkraına Qaýipsizdik keńesinde Shyǵys Eýropa elderiniń atynan sóıleıtin bolady. Osy memleketterge berilgen eki jyldyq mandat 2016 jyldyń 1 qańtarynan bastalady. Olar Qaýipsizdik keńesindegi mandaty aıaqtalatyn Lıtva, Iordanııa, Nıgerııa, Chad jáne Chılıdi almastyrady. BUU-nyń Qaýipsizdik keńesi veto qoıý quqyǵy bar bes elden jáne on tórt turaqty emes múshe elderden turady. Veto qoıýǵa quqyly memleketter – AQSh, Qytaı, Reseı, Ulybrıtanııa jáne Fransııa. Hakerlik shabýyly úshin aıyptaldy Malaızııa bıligi AQSh ádilet mınıstrliginiń suraý salýy boıynsha Kosovo azamaty Ardıd Ferızıdi ustap berdi. Ol amerıkalyq áskerı qyzmetshiler týraly málimetterdi «Islam memleketi» terrorıstik toptaryna berý maqsatynda hakerlik shabýyldar jasady dep aıyptalyp otyr. Malaızııa polısııasynyń basshysy Halıd Ábý Bakardyń aıtýynsha, 20 jastaǵy Ardıd Ferızı 15 qazan kúni Kýala-Lýmpýrda tutqyndalǵan. Quqyq qorǵaý organdarynyń málimetterine qaraǵanda, kosovolyq azamat Sırııadaǵy «Islam memleketiniń» jetekshilerimen baılanysty bolǵan. Al AQSh-tyń ádilet mınıstrligi Ferızıdi kosovolyq hakerler tobynyń jolkórsetýshisi dep sanaıdy. Ol AQSh-ta ornalasqan kompanııalardyń kompıýterlik júıelerin buzyp, 1351 adamnyń jeke aqparattaryn urlaǵan sııaqty. Olardyń ishinde amerıkalyq memlekettik qyzmetshiler men áskerıler de bar. Burynǵy premer-mınıstr qamaýǵa alyndy Moldovada eldiń burynǵy premer-mınıstri, qazirgi kezde jergilikti parlamenttiń depýtaty Vlad Fılat qarjy urlyǵyna qatysy bar degen kúdikpen úsh táýlikke qamaýǵa alyndy. Bul týraly «Interfaks» agenttigi habarlady. Sybaılas jemqorlyqpen kúres jónindegi ulttyq ortalyǵy baspasóz qyzmetiniń aqparatyna qaraǵanda, depýtatty bas prokýratýranyń orderi negizinde parlament ǵımaratynda ustaǵan. Oǵan bank júıesinen sybaılasý arqyly aqsha shyǵardy degen aıyp taǵylyp otyr. V.Fılattyń ustalýyna baılanysty mınıstrler kabınetiniń tóraǵasy Valerıı Streles túsinik berýge májbúr boldy. Sebebi, bul ekeýi Lıberal-demokratııalyq partııasynyń múshesi bolyp tabylady. V.Streles osy máselege baılanysty óziniń otstavkaǵa ketpeıtinin, al partııalas serigi óziniń kinásizdigin dáleldep shyǵýǵa senimdi ekenin atap ótken. Saıası úderisterdi bastaýǵa shaqyrdy [caption id="attachment_2926" align="alignleft" width="560"] Mideast Syria[/caption] Fransııa prezıdenti Fransýa Olland Sırııa janjalyna Reseıdiń aralasýy Bashar Asadtyń prezıdenttik qyzmette qalýyna kómektese almaıdy, dep málimdegen. Ol muny Brıýsselde Eýropalyq odaq sammıtiniń qorytyndysynda aıtqan. «Reseı belgili bir ýaqytqa deıin bıleýshi rejimge qoldaý kórsete alady, biraq, Sırııada Asadtyń saıası bolashaǵy joq», – dep atap ótken F.Olland. Sonymen qatar, ol resmı Damask ókilderiniń qatysýymen arab respýblıkasynyń jańa basshysyn saılaý boıynsha saıası úderisterdi bastaýǵa shaqyrdy. Fransııa basshysy, sondaı-aq, Sırııaǵa qatysty dıplomatııalyq is-áreketti úılestirýdi Fransııa, Ulybrıtanııa jáne Germanııa ózderine alatyndyǵyn ataǵan. Qysqa qaıyryp aıtqanda: * Palestınalyqtar Iordan ózeniniń batys jaǵa­laý­yn­­da evreı hramyn órtegen. Oqıǵa Palestına halqy men Izraıl qaýipsizdik kúshteri arasyndaǵy janjaldyń qyz­­ǵan shaǵynda bolyp otyr. * Qyrǵyzstannyń Bishkek mańyndaǵy Dordoı aýdany aýmaǵynda Shý oblysyndaǵy túrmeden qashqan qylmyskerlerdiń biri – Azamat Musýralıevtiń kózi joıyldy. *Avstralııanyń keden qyzmeti jalpy salmaǵy 70 tonnany quraıtyn kontrabandalyq temeki shıkizatyn tárkiledi. Tárkilengen taýar shamamen 30 mıllıon dollarǵa baǵalanady eken. * Nıgerııanyń Maıdagýrı qalasyndaǵy meshitte bol­ǵan eki jarylystan 40-tan astam adam qurban boldy. Jarylysty terrorıst-jankeshti júzege asyrǵan. Internet materıaldary negizinde ázirlendi.