Mysyrda qurylǵan qoǵamdyq birlestik

Qazaqstannyń Kaır qalasyndaǵy elshili­gin­de elimizdiń dıplomattary jáne Mysyr qaýym­dastyǵy ókilderiniń arasynda Qazaq­stan-Mysyr yntymaqtastyǵyn damytý jolda­ry týraly pikir almasý úshin dástúrli kezdesý ótti. Atalǵan sharaǵa Mysyrdyń kórnekti qoǵam jáne memleket qaıratkerleri, saraptamalyq jáne ǵylymı ortalardyń, isker toptardyń ókilderi, sondaı-aq, jetekshi BAQ jýrnalısteri qatysty. Kezdesýde Qazaqstan elshisi Berik Aryn qonaqtardy Qazaqstannyń ishki saıası ómirindegi asa mańyzdy oqıǵalarmen, atap aıtqanda, elimizde jýyrda ótken prezıdenttik saılaýdyń nátıjeleri týraly habardar etti. Saýda-ekonomıkalyq baılanystardy keńeıtý máselelerin talqylaý barysynda qatysýshylarǵa Prezıdent Nursultan Nazarbaevtyń «Nurly Jol – bolashaqqa bastar jol» Joldaýy men «Qazaqstan- 2050» Strategııasyn iske asyrý sheńberinde Úkimettiń daǵdarysqa qarsy jáne yntalandyrý sharalaryn qolǵa alyp jatqandyǵy, sonymen qatar, Elbasy bastamasymen aıqyndalǵan bes ınstıtýttyq reforma týraly aqparat berildi. Is-sharaǵa qatysýshylar elimizdiń mádenı-áleýmettik ómirindegi jańalyqtar men halyqaralyq bastamalaryna, sonyń ishinde, aldaǵy ótetin Álemdik jáne dástúrli dinder kóshbasshylarynyń V sezine qyzyǵýshylyq tanytty. Olar Qazaqstannyń táýelsizdik jyldary qol jetkizgen jetistikterin joǵary baǵalap, munda Prezıdent N.Á. Nazarbaevtyń orasan zor eńbegi bar ekenin atap ótti. Qatysýshylar Qazaqstan men Mysyr arasyndaǵy ekijaqty qarym-qatynastardy nyǵaıtýdy jáne odan ári damytýdy kózdeı­­tin «Qazaqstan-Mysyr dostyǵynyń qaýym­dastyǵy» atty qoǵamdyq birlestik qurý týraly bastama kóterip, ony biraýyzdan qoldady. Qaýymdastyq tóraǵalyǵyna «Qyzyl teńiz» (Hýrgada qalasy) provınsııasynyń basshysy A.Abdýlla saılandy. Mysyr qoǵamynyń belgili ókilderi «Ál-Azhardyń» janynan qurylǵan únqatysý ortalyǵynyń tóraǵasy, Mysyrdyń burynǵy Ýaqyftar mınıstri H.Zaqzuq, «Ál-Azhar» ýnıversıtetiniń burynǵy rektory, doktor Ý. Ál-Abdı, ár jyldary Mysyrdyń Qazaqstanda elshileri bolǵan Abdalla Ál-Arnýsı men Nabıla Salıama, «Ál-Ahram» men «Ál-Gýmhýrııa» medıa-holdıngteriniń jáne ózge de BAQ-tardyń jýrnalısteri, «Rehana Grýpp» kompanııasynyń basshysy Iа.Abbas pen basqa da birqatar iri kásipkerler, belgili qoǵam qaıratkerleri men ǵalymdar qaýymdastyqtyń qurmetti músheleri bolyp kirdi. «Egemen-aqparat».