ASTANA. 5 shilde. Búgin elordada 30 jup shańyraq kóterdi. Astana kúni qarsańynda bolǵan neke qııý rásimi «Atameken» kesheninde ótti. Bul týraly astana.gov.kz habarlady.
Saltanatty rásimge deıin jas juptardyń ata-analary men týystary aq tilekterin arnap, aqyl-keńesterin aıtty. Alańda ornatylǵan sahnada jas jubaılarǵa resmı túrde neke kýáligi tabystalyp, dástúr boıynsha ómirdegi eń mańyzdy kúnnen belgi retinde estelik sýretke tústi.
Sonymen qatar, barlyq jup Qazaqstannyń eń bıik týynyń tuǵyryna shyǵyp, 111 metrlik jerden júrek pishindi sharlar ushyrdy. Odan bólek, jas jubaılar merekelik fleshmob tamashalady. Shara kezinde 15-ke jýyq adam mýzyka áýenimen júrek formasynda sap túzedi.
Dástúr boıynsha jas jubaılar merekelik tort kesip, qýanyshtaryn jaqyndarymen bólisti. Shara sońynda juptarǵa estelik syılyqtar tabystaldy.
Elaman Qońyr.
Derek, sýret: astana.gov.kz.