Qazaqstan Respýblıkasynyń Memlekettik hatshysy Gúlshara Ábdiqalyqova Japonııa Premer-mınıstri S.Abeniń shaqyrýymen áıelderge arnalǵan «WAW! Tokyo 2015» atty búkilálemdik konferensııanyń ekinshi otyrysyna qatysý úshin jumys saparymen Tokıoǵa keldi, dep habarlady Prezıdenttiń baspasóz qyzmeti.
Memlekettik hatshy Japonııa Premer-mınıstri S.Abemen kezdesti, sondaı-aq, Japonııanyń Bilim, mádenıet, sport, ǵylym jáne tehnologııalar mınıstri H.Shımomýramen kelissózder ótkizdi. Kezdesýde taraptar Qazaqstan men Japonııa arasyndaǵy mádenı-gýmanıtarlyq, sondaı-aq, sport salasyndaǵy yntymaqtastyqtyń damý perspektıvalary jóninde pikir almasty.
G.Ábdiqalyqova eki eldiń joǵary oqý oryndary men ǵylymı ortalyqtary arasyndaǵy almasýlardy jandandyrýdyń mańyzdylyǵyn aıta kelip, akademııalyq yntymaqtastyqty jolǵa qoıý úshin japon ǵalymdarynyń bizdiń jetekshi joǵary oqý oryndaryna, sondaı-aq, Qazaqstan ǵalymdarynyń Japonııa ǵylym jáne bilim ortalyqtaryna saparlaryn uıymdastyrýdy usyndy. Sonymen birge, mádenıet salasyna qatysty qoldanystaǵy kelisimdi ózektendire túsýge usynys jasaldy.
Japonııanyń Áıelder isteri, ákimshilik reforma jáne memlekettik qyzmet jónindegi memlekettik mınıstri H.Arımýramen kezdesýde «100 naqty qadam» – Ult josparyn iske asyrý aıasyndaǵy, onyń ishinde ákimshilik basqarý men memlekettik qyzmet salasyndaǵy ózara is-qımyl máseleleri talqylandy. Sonymen qatar, taraptar áıelderdiń ekonomıkalyq belsendiligin ilgeriletý máselelerinde tájirıbe almasýǵa daıyn ekendikterin bildirdi. H.Arımýrany Memlekettik hatshy 2016 jyly ótetin Astana ekonomıkalyq forýmynyń áıelder kóshbasshylyǵyna arnalǵan paneldik sessııaǵa qatysýǵa shaqyrdy.
Japonııanyń Ekonomıka, saýda jáne ındýstrııa mınıstri I.Mııazavamen «Nurly Jol» baǵdarlamasyn iske asyrýǵa baılanysty japon bıznesi úshin ashylyp jatqan jańa múmkindikteri jáne japon kompanııalarynyń EKSPO-2017 halyqaralyq kórmesine qatysý máselesi talqylandy. Kórmedegi eń iri pavılon Japonııaniki bolady dep josparlanýda.
Densaýlyq saqtaý, eńbek jáne halyqty áleýmettik qorǵaý mınıstri Iа.Shıozakımen kezdesýde medısına salasynda baılanystar ornatý, halyqty mindetti medısınalyq saqtandyrý júıesin engizý jónindegi Japonııa tájirıbesin zerdeleý, dári-dármek salasyndaǵy yntymaqtastyq máseleleri kóterildi. Sonymen qatar, G.Ábdiqalyqova Japonııadaǵy halyqaralyq yntymaqtastyq jónindegi agenttiktiń jáne Ekonomıkalyq yntymaqtastyq jáne damý uıymynyń (EYDU) Tokıodaǵy ókildigi basshylarymen kezdesip, KazAID-ti damytý (damýǵa resmı kómek) úshin ózara is-qımyl men tájirıbe almasýdyń, eldiń ekonomıkalyq saıasatynyń damýyna taldaý jasaý úshin EYDU-nyń saraptamalyq áleýetin paıdalanýdyń máselelerin talqylady.
«Egemen-aqparat».