Astananyń týǵan kúni bıyl da ádettegideı shattyqqa toly kúnder men dýmanǵa toly keshter syılaıtyn mańyzdy is-sharalardan bastaý aldy. Bir jeti boıy ulan-asyr toıǵa ulasatyn merekelik sharalardyń alǵashqy legi bastalyp ta ketti. Sonyń bir aıǵaǵy, keshe elordadaǵy Oqýshylar saraıynyń ortalyq alańynda ótken «Astanam – asqaq ánim!» atty shara. Sahnada Oqýshylar saraıynyń tárbıelenýshileri óner kórsetip, án men bıden shashý shashty. Bul merekelik konsertti tamashalaýǵa balalar, qala turǵyndary men qonaqtary jınaldy.
Sondaı-aq, shara aıasynda ónerli balalardyń qatysýymen jas sýretshiler kórmesi, hıp-hop bı alańy, sport alańy (karate godzıý-rıý, toǵyzqumalaq, shahmat, taekvondo, arqan tartys, kóńildi starttar), bı flesh-moby ótti. Barlyq shyǵarmashylyq alańdarda Oqýshylar saraıynyń tárbıelenýshileri óner kórsetti. Yrǵaqty bıler men sporttyq saıystar qatysýshylar men mereke qonaqtaryn erekshe kóńil kúıge bóledi. Sonymen qatar, jas sýretshiler óz týyndylaryn kórermen nazaryna usynsa, jol jıekterine salynǵan sýret saıysynda balalardyń óz qabiletterin tanytýyna jáne elordaǵa óz týyndylarynyń bir bóligin syılaýǵa múmkindik berdi.
Merekelik baǵdarlamada Oqýshylar saraıynyń óner ujymdary: solıster men vokaldyq toptar, Sholpan Qorǵanbekova jetekshilik etetin dombyra, qobyz, fleıta ansamblderi ujymy, Kaırat Shmanov jetekshilik etetin horeografııalyq ansambl kópshilik aldyna shyqty. Jas gımnasshylar men karatısterdiń sharshy alańdaǵy óneri kórermen qaýymdy beı-jaı qaldyrmady. Sonymen qosa, Oqýshylar saraıynyń jas sángerleriniń qolynan shyqqan «Fashion kz. Jaz-2015» jazǵy toptamasy tanystyryldy. Atalmysh shara sońy áýege túrli-tústi sharlardy ushyrýmen jalǵasty.
Raýshan TÁÝIRHANQYZY,
jýrnalıst.