Májilis Spıkeri Qabıbolla Jaqypov Avstrııa Parlamenti Ulttyq Keńesi Tóraǵasynyń orynbasary Karlhaıns Kopfpen kezdesti. Ol bizdiń elimizge VIII Astana ekonomıkalyq forýmyna qatysýǵa kelgen, dep habarlady Májilistiń baspasóz qyzmeti.
Meıman Astanada kezekti ret túrli el ókilderiniń jınalyp, saıası, ekonomıkalyq máselelerdi talqylaý múmkindigine ıe bolýynyń mańyzdylyǵyna aıryqsha kóńil bóldi. Kezdesý ıeleri Astana men Venanyń senimdi seriktester ekenin atap ótti. K.Kopftyń pikirinshe, Qazaqstan Eýropanyń Ortalyq Azııadaǵy dánekeri retinde joǵary deńgeıde qyzmet atqaryp keledi.
Qabıbolla Jaqypovtyń atap ótkenindeı, bizdiń elimiz aldaǵy ýaqytta da Shyǵys pen Batys, Ońtústik pen Soltústik arasyndaǵy dinaralyq, mádenıaralyq únqatysýdy damytýǵa barynsha yqpal etetin bolady. Oǵan Astanada ótetin Álemdik jáne dástúrli dinder kóshbasshylarynyń sezi tolyq dálel.
Saýda-ekonomıkalyq yntymaqtastyqty sóz etkende, Májilis Spıkeri avstrııalyq bıznesmenderdi «Nurly Jol» Jańa Ekonomıkalyq Saıasaty men ÚIIDB aıasynda Qazaqstanda ındýstrııalyq-ınnovasııalyq jobalardy júzege asyrýǵa belsene qatysýǵa shaqyrdy. Málimet boıynsha, ótken jyly eki el arasyndaǵy taýar aınalymy 3,1 mlrd. AQSh dollaryn quraǵan.
О́z kezeginde Karlhaıns Kopf bizdiń elimizdiń aıqyn jetistikterin aıtyp, avstrııalyq kompanııalardyń Qazaqstanda yqylaspen jumys isteıtinin atap ótti. Sondaı-aq, ol ekijaqty qarym-qatynasty tek úkimetter men dıplomatııalyq baılanystar arqyly ǵana emes, sonymen qatar, parlamentter arasynda da damytý kerektigine toqtaldy.