Aýdandyq gazettiń óz saıty bar

Búgingi kún bıiginen qaraǵanda respýblıkadaǵy aýdandyq gazet­terdiń jaı-kúıi ájeptáýir túzelip qalǵanyn kóremiz. Táýelsizdiktiń alǵashqy jyldarynda, sol tustaǵy ótpeli kezeńde eń aldymen elimizdegi aýdandyq gazetter qıyn da kúrdeli jaǵdaıǵa tap bolǵany belgili. Oqyrmanǵa eń jaqyn bolyp tabylatyn bul basylymdardyń shyǵý jıiligi bir aıǵa deıin shegerildi. Al keńestik kezeńde aýdandyq gazetter aptasyna úsh ret shyǵyp turǵan bolatyn. Buǵan mysal retinde elimizdiń eń shalǵaı óńirleriniń biri – Bókeı ordasy aýdandyq «Orda juldyzy» gazetin ataýǵa bolady. Taıaýda osy gazettiń shyǵa bastaǵanyna 85 jyl toldy. Osy dataǵa baılanys­ty gazet redaktory Baýyrjan Bıse­n­ovten shaqyrý alǵan kezde jerdiń shalǵaılyǵyna qaramastan oǵan arnaıy baryp, aýdandyq býyndaǵy áriptesterimizdiń qýanyshyna or­taqtasqandy jón kórdik. Munda eń aldymen baıqaǵa­ny­myz jerdiń sheti men jeldiń ótinde ornalasqan aýdanda ga­zettiń jaı-kúıiniń jaqsy deń­geıde ekendigi. Redaksııaǵa sý jańa avtokólik beril­gen. Shyǵar­mashylyqpen jumys isteýge qajetti basqa da jaǵdaılar týǵy­­zylypty. Eń bastysy «Jaıyq Press» medıaholdınginiń qura­myn­daǵy «Orda juldyzy» gaze­tiniń óz saıty ashylǵan. Munyń ózi aýdandyq gazette jarııalanǵan materıaldar tórtkúl dúnıege taralady degen sóz. – Oblystaǵy aýdandyq ga­zetterdiń arasynda Bókeı ordasy aýdandyq «Orda juldyzy» gazeti alǵash ret ınternet jelisine qosylyp otyr. Osy arqyly munda jarııalanǵan materıaldarmen tanysqysy keletinderge keń jol ashyldy. О́ıtkeni, onyń óz saıty bar. Bul búgingi ómir talaby. Aldaǵy kezde óńirdegi barlyq aýdandyq gazetterdiń saıttaryn ashýdy oılas­tyryp otyrmyz, – dedi bul jóninde gazet tilshisine «Jaıyq Press» JShS-niń bas dırektory Jan­tas Safýllın. Temir QUSAIYN, «Egemen Qazaqstan». Batys Qazaqstan oblysy, Bókeı ordasy aýdany.