Keshe elordada «Jastardyń kadrlyq rezervi» (JKR) partııalyq jobasynyń III bilim berý modýliniń ashylý saltanaty bolyp, onda jas úmitkerlerdiń bilim-bilikterin jetildirýge úlken múmkindikter ashyldy. Mundaı joba jastardyń tulǵa retinde qalyptasýyna ózindik serpin berýi tıis.
Ústimizdegi jyly atalǵan jobaǵa 3000-ǵa jýyq adam qujat tapsyrsa, sonyń ishinde 32 úmitker Qazaqstan Respýblıkasy Prezıdenti janyndaǵy Memlekettik basqarý akademııasy men «Nur Otan» partııasy Saıası menedjment mektebiniń aıasynda bilimderin jetildiretin bolady. Olar úshin ártúrli kezdesýler, pikirtalastar, semınarlar men sheberlik-sabaqtary jáne dárister uıymdastyrylady. Al dáristerdi ulttyq kompanııalardyń top-menedjerleri, bilikti bapkerler, memlekettik qyzmetshiler men belgili bapkerler, qoǵam qaıratkerleri jáne eń tabysty degen kásip ıeleri júrgizedi dep kútilýde.
Bul oraıda, «Jastar kadrlyq rezervi» jobasy júzege asyryla bastaǵaly beri kóptegen qatysýshylar ártúrli jetistikterge qol jetkizip kele jatqanyn aıta ketý kerek. «Nur Otan» partııasy «Jas Otan» jastar qanatynyń tóraǵasy Shahmardan Baımanovtyń sózine qaraǵanda, jobanyń arqasynda kóptegen jastardyń qyzmetteri joǵarylaǵan, sonymen qatar, olar bıznes salasynyń jetekshileri de bolyp, máslıhat depýtattyǵyna da qol jetkizipti.
Jastardyń kásibı deńgeıin kóteretin jobaǵa irikteý óńirlerde eki kezeń boıynsha júrgizilip, oǵan qatysýshylar óz jobalaryn qorǵaý úshin baryn salypty. Jalpy, joba jastarǵa memlekettik basqarý salasynda mol aqparat berip, olardyń tulǵa retinde qalyptasýy men mol múmkindikterin ashýǵa, sondaı-aq, biliktilikterin tájirıbede qoldanýǵa mol múmkindik beredi. Partııanyń jastar qanaty tóraǵasynyń sózine qaraǵanda, bilimderin jetildirgen jastar artynan memlekettik organdarǵa, ulttyq kompanııalarǵa, bıznes sektoryna taǵylymdamadan ótý úshin jiberiletin bolady.
Sondaı-aq, tóraǵa «Jastar kadrlyq rezervi» jobasy kásibı ósý jolyndaǵy tıimdi saty ekendigin de erekshe atap ketti. Negizinen, jobaǵa qatysýshylar maman retinde qalyptasqan jáne bolashaǵy úshin kásibı jaǵynan damýǵa bet alǵan azamattar ekeni de atalmaı qalmady. Jáne de jobaǵa qatysýshylar bilim men tájirıbe jınaqtaýmen qatar, ár sala boıynsha ózderiniń qyzyqty jobalaryn da júzege asyra alady eken. Sondaı jobalardyń birin «JKR»-diń 2015 jylǵy túlegi Evgenıı Kochetov elimizdiń tarıhı kezeńin sıpattaıtyn «Qazaqstandy ózgertken sózder» atty kitabyn jaryqqa shyǵarypty.
Biz dálizde Shyǵys Qazaqstan oblysynyń Úrjar aýdanynan kelgen memlekettik qyzmetshi Erbolat Muhamedjandy sózge tartqan bolatynbyz. Onyń aıtýynsha, jobaǵa qatysýshylardyń kóbi qyzmeti jaǵynan ósken nemese ózge salalarda jetekshi mamandar retinde qalyptasqan azamattar. Sondyqtan da, ol óziniń memlekettik qyzmettegi laýazymynyń ósýine yqpal etedi degen maqsatpen biliktiligin shyńdaýǵa kelipti. Eger málimet bere ketsek, «Jastardyń kadrlyq rezervi» jobasy «Nur Otan» partııasynyń janyndaǵy «Jas Otan» jastar qanatynyń uıymdastyrýymen, Bilim jáne ǵylym mınıstrliginiń qoldaýymen júzege asyp kele jatqan joba ekendigin tilge tıek ete ketken jón. Jobanyń negizgi maqsaty qazirgi zamanǵa laıyq basqarýshylardy qalyptastyrý bolyp tabylady.
Asqar TURAPBAIULY,
«Egemen Qazaqstan».