Sońǵy kezderi eńbeksiz tabys tabýǵa qulyqtylar qatary kóbeıip ketti. Ońaı oljaǵa kenelýge beıimdiler túrli aıla – sharǵyǵa baryp júrgeni de jasyryn emes. Sonyń ishinde qyz-kelinshekterdiń boı kórsetýi beleń alyp barady. Jaqynda oblysta qarjy pıramıdasyn qurǵan alaıaq áıelderge qatysty sot otyrysy bastaldy. Shaǵyn nesıe uıymynyń atyn jamylǵan tórteýdiń ázirge 94 adamdy taqyrǵa otyrǵyzyp ketkeni anyqtalyp otyr. Jábirlenýshilerdiń aıtýlaryna qaraǵanda, alaıaq áıelderge aldanǵandardyń sany 300-den asýy da múmkin.
«Aı-nur» shaǵyn nesıe uıymynyń atyn búrkengen áıelder turǵyndarǵa 3 mıllıon teńgeden nesıe alyp berýge ýáde etken. Qarjyny rásimdeý úshin kól- kósir qujat daıyndatqan. Bul senimdilikke kirýdiń joly, aldaýdyń basy bolsa kerek. Konsaltıngtiń qyzmeti úshin zardap shegýshilerdiń árqaısysynan 55 myń teńgeden qarjy alyp, qaltalaryna basqan. Buǵan qosa alaıaq áıelder aqtóbelikterdi jumysqa ornalastyrmaq ta bolǵan kórinedi. Ańqaý aqtóbelikterdiń senimine kirgen alaıaq «arýlar» arzan jer men páter alyp berýge de ýáde bergen. Qazir iri kólemde alaıaqtyq jasady dep aıyp taǵylǵan tórt áıeldiń ekeýi qamaýǵa alynsa, ekeýi kepil aqshaǵa bosatylǵan. Sot prosesi jalǵasýda.
Satybaldy SÁÝIRBAI,
«Egemen Qazaqstan».
Aqtóbe oblysy.