Elbasy Nursultan Nazarbaevtyń bastamasymen besinshi márte uıymdastyrylǵan Álemdik jáne dástúrli dinder lıderleriniń sezderi buryn-sońdy álemde bolmaǵan tarıhı jıyn ekenine eshkimniń talasy joq. Dástúrge aınalǵan quryltaı buǵan deıin bir ústeldiń basyna biriktirý múmkin bolmaı kelgen din ókilderin ortaq múdde, ortaq qundylyqtar jolynda qaıta-qaıta qaýyshtyrýda.
Osylaısha sezd, eń aldymen, Batys pen Shyǵystyń arasyn bir-birimen jaqyndastyrý, ortaq múddege jumyldyrý múmkin ekendigin, olardyń ózara túsinise alatynyn dáleldedi. Kezekti besinshi sezd álemde beıbitshilikti qalyptastyrýda dinı tulǵalar men saıası kóshbasshylardyń rólin aıqyndaýǵa óz úlesin qosty. Osyndaı qaıratkerlerdiń áleýetin biriktire otyryp, álemde beıbit ómirdi qalyptastyrýǵa jáne jan-jaqty damý máselelerin sheshýge bolatynyn kórsetti dep sanaımyn. Búginde álemde geosaıası jaǵdaılar shıelenisip turǵan qıyn kezeń ekeni barshaǵa belgili. О́ıtkeni, álemdik geosaıasat kartasynda qalyptasqan búgingi ahýal kúrdeli. Dinı uǵymdardy burmalaǵan túrli toptar, aǵymdar paıda boldy. Olardyń agressııalyq pikirleri quramyndaǵy múshelerin lańkestik áreketterge ıtermeleýde. Osy problemalardy qaıtkende birlesip sheshe alamyz? Álem elderiniń «Islam memleketi» degenge qatynasy qalaı bolýy kerek? Atalǵan uıym jasap otyrǵan lańkestik áreketterge qaıtsek qarsy tura alamyz? Radıkaldyq áreketterdiń aldyn qalaı alamyz? Ártúrli din ókilderi bul máselelermen qaıtkende birlesip kúrese alady? Quryltaı barysynda osy máseleler tóńireginde jeterlikteı pikirler aıtylyp, baǵyt-baǵdarlar men ortaq ustanymdardy naqtylaýǵa jaǵdaılar jasaldy dep aıtýǵa bolady.
Erkinbek ShOHAEV,
Atyraý oblysy Din isteri basqarmasynyń basshysy.