Daǵdarystar – ótpeli, qundylyqtar – máńgilik

Senbi kúni «Nur Otan» partııasy Tóraǵasynyń birinshi orynbasary Asqar Myrzahmetov Astana qalasynyń zııaly qaýym ókilderimen kezdesti. Kezdesýge jazýshy, Memlekettik syılyqtyń laýreaty Nesipbek Aıtuly, «Egemen Qazaqstan» AQ prezıdenti Saýytbek Abdrahmanov, Qazaq­stannyń eńbek sińirgen qaıratkeri, Májilis depýtaty Aldan Smaıyl, L.N. Gýmılev atyndaǵy Eýrazııa ulttyq ýnıversıtetiniń rektory, tarıh ǵylymdarynyń doktory Erlan Sydyqov, jazýshy, Memlekettik syılyqtyń laýreaty Qajyǵalı Muhanbetqalıuly, L.N. Gýmılev atyndaǵy Eýrazııa ulttyq ýnıversıtetiniń professory, akademık Seıit Qasqabasov, jazýshy, halyqaralyq «Alash» syılyǵynyń laýreaty, qoǵam qaıratkeri Myrzakeldi Kemel, kórnekti ǵalym, Qazaqstannyń eńbek sińirgen qaıratkeri Namazaly Omashev, Memleket tarıhy ınstıtýtynyń dırektory, tarıh ǵylymdarynyń doktory Búrkitbaı Aıaǵan, aqyn, halyqaralyq «Alash» syılyǵynyń laýreaty Dáýletkereı Kápuly jáne basqa belgili tulǵalar qatysty. «Daǵdarystar – ótpeli, qundylyqtar – máńgilik» taqyrybymen ótken jıynda partııanyń eldiń mádenı-rýhanı damýyndaǵy, qoǵamnyń birligi men yntymaǵyn arttyrýdaǵy qyzmeti men maqsat-mindetteri, Elbasy usynǵan Uly dala uǵymyn qalyptastyrý jáne osynaý jalpyhalyqtyq istegi zııaly qaýymnyń róli sóz boldy. Ulttyń mádenı-rýhanı órkendeýi eldiń tutas damýynda asa mańyzdy oryn alatynyna toqtalǵan partııa Tóraǵasynyń birinshi orynbasary óz sózinde eldegi jetekshi saıası kúsh retinde «Nur Otannyń» atqaryp jatqan jumystary týraly áńgimeledi. «Elbasy halyqtyq bes reformada bolashaǵy birtutas ultty qalyptastyrýda memleket quraýshy ult retinde halqymyzǵa erekshe jaýapkershilik júkteletinin atap kórsetti. Osynaý iste ózderińizdeı el jaqsylarynyń atqaratyn róli erekshe. Memleket basshysynyń táýelsizdikti nyǵaıtý jolyndaǵy batyl bastamalarynyń júzege asýy eldiń mádenıeti men ádebıetiniń, óneriniń damýyna súbeli eńbek sińirgen sizderdiń kóz aldaryńyzda. Aldaǵy ýaqytta qoǵamdy osy qol jetken jetistikti ári qaraı jalǵastyrýǵa jumyldyrý paryz. Búgingi kezdesýde basty maqsat – ózderińizben osy másele boıynsha oı bólisý», – dedi A. Myrzahmetov. Partııa Tóraǵasynyń birinshi orynbasary «Daǵdarystar – ótpeli, qundylyqtar – máńgilik» taqyrybymen ótken kezdesý barysynda jahandyq ekonomıkalyq qıyndyqtar tusynda elimizdiń syn-qaterlerden súrinbeı ótýi úshin qoǵamdaǵy birliktiń nyǵaıa túsýi barynsha mańyzdy ekenine, osy tusta zııa­ly qaýymǵa úlken senim artylatynyna toqtaldy. Sonymen qatar, jıynda Elbasynyń Qazaqstandy álemge Uly dala uranymen tanytý jónindegi ıdeıasynyń kókeıkestiligi, osynaý uǵymdy ulttyq brend retinde qalyptastyrý máselesi jan-jaqty aıtyldy. Búginde partııa 865 myńnan astam nurotandyqtyń basyn qosyp otyrǵan bolsa, sonyń ishinde zııaly qaýymnyń úlesi aýqymdy. El ıgiligi jolyndaǵy bastamalarǵa qoǵamdy jumyldyrýda partııalastardyń 30,4%-yn, ıaǵnı 263 341 adamdy quraıtyn bilim men ǵylym, mádenıet salasynyń ókilderi  asa úlken kúsh. Olar partııanyń qoǵamnyń birligi men yntymaǵyn bekemdeýge baǵyttalǵan keshendi de aýqymdy sharalaryna súbeli úles qosyp keledi. Bıyl barsha Qazaqstan halqy keńinen merekelep jatqan Qazaq handyǵynyń 550, Uly Jeńistiń 70, Qazaqstan halqy Assambleıasy men Qazaqstan Respýblıkasy Konstıtýsııasynyń 20 jyldyǵy merekelerine «Nur Otan» partııasy aıryqsha basymdyq berip, osy ataýly mereıtoılar aıasynda túrli sharalar ótkizip keledi. «Nur Otan» qoǵamda birlik pen yntymaqty saqtaý men qazaqstandyq patrıotızmdi qalyptastyrý bo­ıynsha júıeli jumys júrgizýde. Mádenıet pen ónerdi qoldaý jónindegi «Mıras» qoǵamdyq keńesi alańynda bilim men mádenıetti saqtaý jáne damytý, memlekettik tildiń aıasyn keńeıtý sııaqty kókeıkesti máseleler keńinen talqylanyp, sheshimin tabýda. Ár kezdegi otyrystardyń qorytyndysy boıynsha Parlament pen Úkimetke, tıisti mınıstrlik­terge mádenıet pen rýhanııattyń túrli baǵyttaryn damytýdy kózdegen 300-ge jýyq naqty usynystar ázirlenip, joldandy. Bul usynystar Keńestiń turaqty qadaǵalaýynda. Áńgime barysynda otandyq mádenıetti damytý máseleleri men búgingi ádebıettiń betalysy jaıly sóz boldy. Zııaly qaýym ókilderi ulttyq qundylyqtar, urpaq tárbıesi, dástúr sabaqtastyǵy týraly óreli áńgimeler aıtyp, ashyq pikir almasty. Kezdesýdiń sońynda partııa Tóraǵasynyń birin­shi orynbasary qonaqtardy Konstıtýsııanyń 20 jyldyq mereıtoıymen quttyqtap, shyǵarmashy­lyq tabys tiledi.